Boo ni Binay

Nasikwati hinuon si Bise Presidente Jejomar Binay sa iyang pagtuo kang Mayor Mike Rama nga makapasikat sa Sinulog sa Sugbo karong tuiga pinaagi sa pagsaka sa grandstand sa Cebu City Sports Center sa dihang kadaghanan sa mga tawo sa sulod mi-boo sa bise presidente.

Nakabasa ko sa Facebook nga ang mga sakop sa Liberal Party ang gipasanginlan nga mi-boo kang Binay, samtang sa laing bahin, mismo si Binay ug Mike nagkanayon nga wala sila makadungog og boo sa mga tawo.

Akong punto niini: ang Sinulog Foundation kontrolado ni Mike kay siyay chairman, busa kontrolado nila kinsay pasudlon ug ang ilang mahatagan og pabor ang mga sakop sa United Nationalist Alliance ni Binay. Ikaduha, kun wala sila makadungog og boo, kinahanglan silang Mike ug Binay mangatuli kay nabungol sa boo sa mga tawo.

Nakaingon ko nga nasikwati si Binay tungod kay mismo siya ug si Mike nasayod nga dili madala og ulog-ulog ang mga tawo sa Sugbo. Ang mga Sugboanon masuko gayod kun adunay mga politiko nga magpa-epal atol sa Sinulog.

Akong nadunggan nga giimbitar usab si Kongresista Martin Romualdez sa Sinulog, apan gawas nga namatyan kini tungod sa kamatayon ni Atty, Democrito Mendoza Sr., apohan sa Cebuana niyang asawang si Yedda Marie, nagduhaduha kini og adto kay dili gustong mogamit sa Sinulog alang sa politika. Nakadayeg ko ni Romualdez niining puntoha.

Apan tungod sa ka-epal ni Binay, wala gyud siya maulaw nga nagpa-introduce ni Mike ug migunit pa sa mikropono aron makigpulong sa mga tawo. Boo hinuon ang iyang nadawat.

* * *

Mao usab kini sa grupo nilang Mayor Jonas Cortes ug Kongresista Luigi Quisumbing kinsa wala maulaw nga migamit sa relihiyosong kalihukan sa Traslacion ug fluvial procession sa imahen sa Balaang Bata nga si Sr. Sto. Niño aron makapangampanya.

Bisan sa pasidaan sa simbahan nga dili paapilan og politika ang Sinulog, ang grupo nilang Jonas ug Luigi walay ulaw nga nagtapok og kuyog sa Traslacion nga nanagsul-ob sa ilang campaign T-shirt nga kolor yellow.

Pastilan, dili man unta political rally ang Traslacion nganong sul-oban man gyud og yellow nga political T-shirt? Usa pa, dili man tanang kuyog sa ilang panon mga opisyal sa Mandaue, adunay uban nga kandidato ra.

Wala gyuy taga-simbahan nga mibadlong nilang Jonas ug Luigi. Hinuon, wala gyud palingkori ang atubangan nga bahin sa St. Joseph Church sa Mandaue nga gipareserba gyud sa grupo nilang Jonas ug Luigi.

* * *

Nalipay gani ko nga ang mga dagkong kandidato sama nilang Mar Roxas ug Digong Duterte wala mogamit sa Sinulog sa ilang pasikat, naa hinuoy Binay, Jonas ug Luigi nga walay uwaw nga misakay sa selebrasyon alang sa politikanhon nilang kalihukan.