Way propesyonalismo sa buhatan ni JVR

Dili makapaabot og “professionalism” ang Chief Executive Officer sa Asian Marine Transport Corp. nga si Paul Rodriguez sa mga opisyal sa Talisay City tungod kay lisod kining makit-an sa kasamtangang pamunoan ni Mayor Johnny V. Delos Reyes.

Ingon na gyud niini ang Talisay City. Kanang sistema sa administrasyon ni Delos Reyes nga “tayo-tayo” lang nakadaot sa pamalakad sa siyudad.

Wala’y dili makapangagot sa kawala’y propesyonalismo ni Delos Reyes. Kun ang iyang opisina ang nag-schedule nga ang “contract signing” himuon unta niadtong Biyernes sa alas 10 sa buntag, kinsa may nagbuot niini? Dili pud ko motuo nga nagbuotbuot lang ang tawo ni Delos Reyes pag-schedule sa pinirmahay nga wala siya’y kalibutan.

Kun propesyonal pa lang unta si Delos Reyes, wala unta niya i-schedule ang pinirmahay. Aron dili malangan ang mga opisyal sa Asian Marine Transport, iya unta kining gisultian sa nakit-ang lungag sa gi-draft nga kontrata ug nga gusto nilang padak-an pa ang abang nga ilang pangayoon gikan sa kompaniya.

Ang Asian Marine moabang unta sa luna sa San Roque, Talisay aron himuon nilang dunggoanan sa ilang mga Ro-Ro. Unang nasabutan ang P800,000 nga abang. Apan nakita sa mga opisyal sa Talisay nga gamay ra kini ug si City Legal Officer Alfredo Sipalay maoy mipasabot nga gusto sa siyudad nga P1.098 milyones sa 24,846-metro kuwadrado nga luna matag bulan.

Wala koy kuwestiyon sa pagpataas sa abang. Prerogative kini sa kagamhanan sa siyudad.

Apan ang ako lang, wala unta paadtoa ang mga opisyal sa Asian Marine aron lang dili atubangon ni Delos Reyes ug balibaran lang kay gamay ra ang naa sa kontrata. Mahimo man kining sultian pinaagi sa telepono nga dili madayon ang pinirmahay. Apan wala kini mahitabo kay wala sa hunahuna ni Delos Reyes ang propesyonalismo.

* * *

Ang giduso ni Solid Waste Management Board Chairman Janeses Ponce nga amendahan ang ordinansa sa garbage fees maayong tun-an pag-ayo sa Konseho sa dakbayan.

Makaayo kini alang sa siyudad tungod kay maghatag kini og hustisya sa mga Sugboanon. Ngano man? Tinuod ang gitug-an ni Atty. Ponce nga daghang mga establisamento nga gamay ra kaayo og tinuig nga garbage fees bisan sa kadaghan sa mga tawo (sama sa mga tunghaan).

Kining mga establisamento nga daghan og tawo sama sa malls, department stores, mga unibersidad ug kolehiyo angayang paninglan og taastaas nga garbage fees ikomparar sa mga household owners nga lima ngadto sa 10 ra ka tawo ang anaa sa panimalay.

Mas daghang basura, mas dako og bayranan – mao kini ang prinsipyo nga giduso ni Atty. Ponce nga angay suportahan sa mga Sugboanon.