Klaro kaayo kinsa’y sad-an

Arang-arang na lang kay gipasalig g’yud ni DILG Secretary Mar Roxas nga kadto’ng mga opisyal nga angay’ng manubag sa nahitabo sa 44 ka sakop sa PNP Special Action Force (SAF) didto sa Mamasapano, Maguindanao patubagon g’yud.

Sa ato pa, kun human unya sa imbestigasyon nga gihimo ug masuta nga angayan nga pahamtangan og silot ang mao nga mga opisyal, dili magpanuko ang kagamhanan sa paghimo niini.

Sa Senate Inquiry nga gihimo sa mga senador kaniadto’ng miagi’ng adlaw, gibatil pag-ayo ni Senador Miriam Defensor Santiago ang suspendido’ng PNP Chief nga si Alan Purisima kun ngano nga bisan og gisuspenso siya, apan nag-apil-apil gihapon siya sa mga kalihukan sa kapolisan.

Wala gayud ikalipay ni Senador Santiago nga gilimdan nila ni Purisima ug SAF Commander Getulio Napeñas ang Acting PNP Chief nga si Leonardo Espina ingon man si DILG Secretary Roxas sa mao nga operasyon pagdakop ni Marwan.

Kun imo’ng tutokan pag-ayo, ang sad-an niini’ng tanan nga walay koordinasyon ang mao nga operasyon sa ubang mga yunit sa kagamhanan mao g’yud sila si Purisima ug Napeñas.

Tinuod nga gitigum sila ni Presidente Aquino pipila ka adlaw sa wala pa ipahigayon ang operasyon didto sa pinuy-anan sa pangulo nga gitawag og Bahay Pangarap, apan giingnan sila ni PNoy nga sila na ang bahala pakig-coordinate sa militar.

Apan giingnan ni Purisima si Napeñas nga dili lang usa pahibaw-on si Acting PNP Chief Espina, si Roxas ug bisan ang militar kabahin sa operasyon. Ngano man g’yud? Nagduda ba si Purisima nga sila si Roxas ug Espina tua makapusta sa pikas?

Kun may koordinasyon pa sa militar, tingali may giandam na unta nga mga helicopter ug diha nga nagpinusilay na, makapadala unta dayon og chopper aron maoy mopik-ap sa mga SAF nga maoy mi-attack sa gipuy-an ni Marwan.

Gisundog man nila ang gihimo sa mga sakop sa Central Intelligence Agency (CIA) nga miatake sa safehouse nga gitagoan ni Osama Bin Laden didto sa Abbottabad, Pakistan nga wala mo-coordinate sa mga militar sa mao nga dapit.

Gihimo kadto sa CIA kay migamit man sila og powerful nga helicopter nga gisakyan sa mga CIA agents ug human nila mapatay si Bin Laden abtik usab kaayo nga mosibat. Sa ato pa, husto sa plano.

Apan ang gihimo sa SAF ubos sa kamandoan ni Napeñas, kuwang sa plano. Diha’ng nangayo og reenforcement ang mga sakop sa SAF, wala gani makapadala. Pagkapaet!