Dawaton ang mga pagsulay
Dili lalim ang pagpatukod og balay, mga anak ug kab’tangan sa atong pagpuyo, apan tungod sa bagyo’ng Yolanda kalit lang ka nga naut-ot. Kinsa may imong basulon?
Hinuon kun nag-alagad ka og Dios, makasabot ka nga ang tanan pagbuot sa Dios ug ang imong ikasulti mao ra g’yud nga unta tabangan ka Niya nga makabangon gikan sa imong pagkahapay.
Si PNoy, ang atong presidente sa nasud, miingon nga gihimo na nila ang tanang paagi aron makatabang sa dako’ng panginahanglan sa tanang nabiktima sa bagyo’ng Yolanda ug sa linog nga 7.2 magnitude. Base sa Biblia, may tawo nga gipasulayan sa Dios ni Satanas apan wala g’yud mobiya sa pag-alagad sa Dios.
Siya mao si Job, usa ka tinuod nga alagad sa Dios ug diha’ng misugot ang Dios sa hangyo ni Satanas nga iyang suwayan kun dili ba mabugnaw si Job sa iyang pagsalig ug pagtuo sa Dios, iya dayong gisugdan.
Usa ka adlaw kalit lang misumbong ang mga suloguon ni Job nga gihapak ang iyang mga anak og kusog nga hangin hinungdan nga nangamatay ang tanan.
Pagkataud-taod laing suloguon na usab ang misumbong kang Job kalabot sa katalagman nga mipatay sa linibo niya ka baka ug karnero, unya gitugkan pa siya og mga hubag sa lawas gikan sa lapa-lapa hangtud sa ulo.
Dayon gipangutana siya sa iyang asawa kun magpadayon pa ba siya pagsimba sa iyang Dios. Ug mitubag si Job sa pag-ingon, buang-buang ka nga pagka-asawa, mudawat ka ba lang sa maayo, ug sa dautan dili?
Hubo akong migawas sa taguangkan sa akong inahan, ug hubo usab akong mopauli sa abog, kay gikan ako sa abog, ug sa abog usab ako pauli.
* * *
- Latest
