Mga SUV sa City Hall gigamit sa personal

Nag-trending sa Facebook ang kontrobersiyal nga biyahe sa duha ka mga SUV nga iya sa kagamhanan sa dakbayan sa Sugbo sa adlaw’ng Domingo, adlaw nga tingpahulay sa mga kawani ug opisyal sa gobiyerno.

Unang mibutho sa social media ang sakyanan nga giisyu sa buhatan ni DSWS head Ester Concha tungod kay nakit-an kining mi-parking duol sa MO2 ug nanulod sa usa ka urban resort ang mga drayber ug mga sakay niini, apil na ang mga bata. Misunod pag-trending ang laing sakyanan nga gigamit ni Kapitan JongJong Alcover pagbiyahe paingon sa Oslob.

Among kaubang editor sa The Freeman ug brodkaster sa DyLA nga si Fred Languido ang nakakuha og hulagway ug gi-post sa Facebook sa tuyo nga mapukaw ang mga hingtungdang buhatan nga gitahasan pag-monitor niining mga sakyanan sa gobiyerno nga panggamiton sa personal nilang lakaw ug katuyoan. Inay moani og pagdayeg si Fred, gidabodabohan na hinuon siya sa pagsaway gikan sa tawo nga lunod-patay’ng supporter ni Mayor Mike Rama nga sa akong nahibaw-an anaa na usab diay magtrabaho sa Cebu City Hall.

Nagkagot akong bag-ang nga nagbasa sa mga post. Apan wala na lang ko motimang kay ang pikas kampo dili man makadawat sa kamatuoran nga adunay mga empleyado sa Cebu City Hall, nga labing seguro nga political supporter ni Mike, ug mga opisyal nga sakop sa Team Rama nga mga badlongon nga mogamit sa mga sakyanan sa gobiyerno sa adlaw’ng Domingo.

Maayo tingaleng pahinumdoman kining mga kanahan nga kanang mga sakyanan wala kana mapalit pinaagi sa personal nga kuwarta ni Mike, ug dili na alang sa personal nga kagamitan sa mga gipangdestinohan. Kuwarta sa mga magbubuhis ang gipalit niana, lakip na ang gipa-gasolina.

Ang nakaparat ra ba kay kun motunga kining ingon ani nga isyu, moingon dayon ang kampo ni Mike nga pamolitika kini ug hinimo sa kampo ni Mayor Tomas Osmeña. Kun ingon niini, pulos badlongon ang mga tawo sa gobiyerno kay kun adunay imbestigasyon ingnon ra man ang imbestigador nga pamolitika ra ni sa pikas.

Mosaludo kong Mike kun masilotan niya ang sad-an niining isyuha, dili ang pagdepensa pinaagi sa paghimohimo og trip ticket aron i-justify sa mga biyahe.

Mao ra kini sa kaso ni Bise Presidente Jejomar Binay. Sa dihang giakusahan siya nga gi-overprice ang Makati parking building ug may bahandi nga dili niya ma-esplikar nga naglakip sa 350-ektaryas nga hacienda sa Rosario, Batangas nga adunay aircondition nga baboyan ug farm sa mga manok pangsabong, iya na hinuong gipasanginlan ang kampo ni DILG Sec. Mar Roxas ug Senador Antonio Trillanes III nga namolitika.