Ipatigbabaw ang interest sa nasud

Gipangayo sa mga kabanay ni Jeffrey "Jenifer" Laude ang hustisya nunot sa kamatayon niini diin maoy gipasanginlang responsable ang 19 anyos nga US Marine nga si Private First Class Joseph Scott Pemberton.

Gawas sa mga kabanay ni Laude, nangayo usab og hustisya ang mga kapareha niya nga mga mahuyang ug tomboy tungod sa brutal nga pagpatay sa ilang kaliwat. Gawas kanila aduna usa’y pipila ka grupo nga mipaluyo sa pagpangayo’g hustisya.

Sa akong nakita init kaayo ang mga kabanay ni Laude sa pagpangayo og hustisya. Gani ilang gipugos ang kagamhanan ni Pangulong Noynoy Aquino sa pagpanghilabot na sa kaso ni Laude.

Apan dili kaha mabugnaw ang ilang kainit sa pagpangayo og hustisya kun tanyagan na sila og salapi o butang sa Amerika ug sa ato mismo’ng gobiyerno aron mosibog sila sa kaso’ng ilang gipasaka batok sa Amerikano’ng sundawo?

Sigun sa atong kasinatian, daghan na’ng mga Pinoy nga giabuso sa mga Amerikano nga mibaliktad sa ilang una nga baruganan ug misibog sa ilang reklamo batok sa mga Amerikano tungod sa pagpursige sa ato mismo’ng gobiyerno ug sa Amerika nga isibog ang kaso nga ilang gipasaka.

Ang sama niini’ng kaso sayon kaayo’ng sabton ug dali ra usab nato nga masabtan kun ngano’ng imbes kay motabang sa iya mismo’ng katawhan, ang gobiyerno sa Pilipinas adto na hinuon mopabor sa mga Amerikano nga nangabuso.

Kini tungod kay mas gipalabi sa atong gobiyerno ang interest sa nasud kay sa tagsa-tagsa nato nga interest. Dili gusto ang gobiyerno sa Pilipinas nga ikompromiso niini ang iyang maayong relasyon sa Amerika tungod lang sa usa ka tawo nga nayatakan ug naabuso ang katungod.