EDITORYAL - Pasiuna nga bayad sa buhis

Ang SM Prime Holdings Incorporated andam mohatag og advance tax payment ngadto sa dakbayan sa Sugbo ubos sa kondisyon nga gastohon kini pagpalambo sa karsada ug ubang proyekto diha duol sa ilang balay-patigayon.

Atol sa administrasyon ni kanhi Mayor Tomas R. Osmeña gidasig ni Tommy ang mga magbubuhis nga mohatag sila og pasiuna nga buhis ngadto sa City Hall ug sila ang mosugyot unsa ang gusto nila nga proyekto nga himoon diha sa dapit nga ilang nahimutangan.

Ang SM kaniadto mihatag sa City Hall og P50 milyones nga pasiuna’ng bayad sa ilang real property ug business tax sa kondisyon nga gamiton ang kuwarta pagpanindot sa mga karsada duol sa ila’ng mall ug sa pag-atiman sa Mahiga Creek.

Karon’g bag-o lang, misugyot na usab ang SM nga andam sila mogasto paghimo'g karsada sa Seaside portion luyo sa gipalit nila nga yuta sa South Road Properties (SRP) basta isipon lang nga pasiuna gihapon nga bayad sa buhis.

Supak si Mayor Michael Rama sa sugyot kay giisip niya nga dili kini makiangayon niadtong mga dapit nga ang mga magpapatigayon dili mohatag og advance tax payment.

Dili ba makadani kini sa uban nga mga mag-papatigayon nga mosundog sila sa gihimo sa SM ug matuman ang slogan sa mayor nga “Public, Private, Partnership?”

Kun hilngon ang rekord sa City Treasurer’s Office, daghan kaayo nga magpapatigayon ang wala g’yud mobayad og buhis ngadto sa dakbayan ug sila gipasagdan lang sa mga opisyal.