Kalbaryo sa mga tigom

Akong gipangutana ang bag-ong natudlo nga Cebu City Administrator, Engr. Eugene Elizalde, kun kabahin ba sa iyang trabaho ang pagdisiplina ni Mayor Mike Rama atubangan sa sibaw nga mga reklamo sa mga opisyal sa gobyerno ug pribadong sektor nga ang mga tigom nga gipatawag ug giduma sa mayor sa niaging kapin na sa tulo ka tuig kasagaran uwahi nga magsugod ug dugay sab kaayong mahuman.

Wa ipanghimakak ni Elizalde ang problema dihang nagkahinabi mi niadtong Biyernes. Apan nihangyo nga di lang gamiton ang pung nga disiplina. Kay kun dasonan ang panginahanglan pagdisiplina sa mayor nabalaka si Elizalde nga mao na toy una ug kataposan niyang adlaw sa bag-o niyang trabaho.

* * *

Si Rama ang gitumbok nga hinungdan sa nagkayamukat nga schedule sa iyang mga tigom. Matod sa iyang mga suod kasagaran mauwahi siya og abot maong dugay nga makasugod. Ang way kahumanan niyang istorya maoy kasagarang makapainat ug makapadugay og human sa mga tigom. Tungod sa kasikit ug kapuno sa iyang kalendaryo magtakud-takod nang kalangay sa sunod pa niyang mga tigom.

Matod ni Elizalde di iyang trabaho ang pagseguro nga matuman ang schedule ug nga magsugod ug mahuman sa gitakdang mga oras ang mga tigom sa mayor. Gisangon ni nila kang Belinda Navascuez, executive secretary ni Rama.

* * *

Nipasabot si Elizalde nga ang nag-unang hinungdan nga nag-awas ang mga gimbuhaton sa mayor mao ang pagpanginlabot ni Rama sa hapit tanang kalihokan sa City Hall. Nipuno siya nga ganahan si Rama nga manghilabot bisan sa labing gagmay’ng mga detalye sa mga proyekto ug ubang mga gimbuhaton.

Ginamit ang kasinatian pagduma sa iyang pribadong mga negosyo, nipasalig si Elizalde nga iyang paningkamotan nga mahimo sa tanang department heads ug mga kawani sa City Hall ang tagsa-tagsa nila ka mga gimbuhaton sa labing daling panahon ug sa labing maayong paagi aron nga di na kinahanglan nga samukon o manginlabot pa ang mayor.

* * *

Usa sa mga tigom ni Rama sa niaging tuig mahisama unta sa uban niyang mga tigom nga dugay magsugod ug dugay mahuman. Kun di pa isog ang usa sa mga opisyal nga apil sa tigom. Dihang wa moabot ang mayor sa gitakdang panahon, gisugdan niya ang tigom isip kasamtangang tagduma. Kay wa pa man moabot ang mayor bisan natuki na nilang tibuok agenda gitak-opan niya ang tigom.

Haskang sukoa ni Mayor Rama dihang wa na niya maabti ang kasagaran sa mga gipatawag niya sa tigom. Gisukmatan ang iyang mga sinaligan nga di angay’ng sugdan ang mga tigom kun di pa siyang moabot, labi na kun mopasalig siya nga motambong.

Posibleng nakit-an na nilang Navascuez ug Elizalde ang sulbad sa problema: Pagdasig sa mga manambong sa tigom pagsugod ug paghuman sa gitakdang oras--makatambong o di si Rama.

* * *

Email: [email protected].