Police giinsulto sa tulisan

Sayong nangabli ang mga tulisan sa Palawan Pera Padala sa may Barangay Mabolo sa dakbayan niadtong Martes sa buntag. Ang mga tulisan nga nagsakay og motorsiklo nakadala og usa ka gatos ka libo kapin nga salapi.

Ang tulis sa Palawan Pera Padala nakasakop sa kahinay sa mga polis nga nadistino sa Mabolo Police Station sa pagtubag sa mga kaso sa pagpanulis. Ang tulis sa Palawan nakapadiskobre sa mga polis sa Mabolo nga maayo lang sila sa praktis, paspas ang lihok kun adunay General Inspection pero sa ultimaora  paspas pang ulod nga nagkamang.

Ang tulis sa Palawan nakapadispuga sa dugay nang kamatuoran nga gitagoan sa mga polis sa Mabolo Police Station nga hangtod karon wala pa diay sila masayod sa sakop sa ilang teritoryo. Pagkaluoy sa mga polis sa Mabolo. Pero kun luoy ang mga polis sa Mabolo mas luoy ang mga tawo ug negosyo nga nasulod sa ilang teritoryo.

Sa kahayag sa adlaw ug sa gilay-ong 60 metros gikan sa ilang police station miabot og tunga sa oras ang pagtubag sa mga polis sa Mabolo sa Palawan Pera Padala nga gitulis.

In fairness sa mga polis sa Mabolo nakatubag dayon kuno sila sa alarma sa tulis pero wala lang kuno nila matoltuli dayon ang Palawan nga gitulis tungod sa kadaghan niini diha sa Mabolo. Sa laktod nga pagkasulti, nangasaag sa sila sa wala pa sila makatultol sa Palawan Pera Padala nga gitulis. Tungod sa gidugayon sa ilang pag-abot ang mga tulisan posibling nahuman na og bahin sa ilang tinulisan.

Labing seguro sa mga panahon nga ang mga polis sa Mabolo nagsige pa og pangita sa biktima sa tulis, ang mga tulisan mapahiyumon usab seguro nga naglantaw nila samtang nagbahinay na sa ilang tinulisan. Maayo na lang gani kay wala na lang pikti sa mga tulisan ang ilong sa mga polis sa Mabolo.