EDITORYAL - Pagtangtang sa mga patay gikan sa lista sa mga botante

Giplano  na  sa taga  Comelec  nga  panglaksion  na  gikan  sa listahan  sa  mga  botante  ang  mga  botanteng  dugay   na  nga  namatay.

Kay  sa  kasamtangang  populasyon  sa  mga  botante  nga  55 milyones, kauban  pa  niini  bisan  kadtong   20  ka tuig  nga namatay apan  anaa  gihapon  sa listahan  sa Comelec.

Sa mga panahon  nga way  election  kun  gikugihan pa  sa  maong ahensya  ang  pagpanangtang  sa mga  ngan  sa mga  namatay  na, aw dugay  ra  nga  nahawan  ang  listahan  sa mga  botante.

Apan  nagtuo  ang  kadaghanan  nga  may  mga  higayon  nga  giapil pa  sa pagpabotar  ang  mga  patay  na . Kini  tungod  kay wa man kini  kuhaa  sa taga Comelec  gikan sa listahan  sa mga  botante.

Di  usab  kita  makapugong  sa  mga  pagduda  sa publiko  kun unsay  tumong  sa  Comelec  nganong  gipasagdan  nila  ang  mga nangamatay  na  nga  magpabilin  pa sa ilang  listahan.

Sa way  duhaduha  nahilakip  gihapon  kini  sa  kuwentada  nga  55 milyones  ka botante  ang  ania  sa  nasud.

Apan  karon  nga  PCOS  machine  na  ang  gigamit  sa election, maglisud  na  pagbotar  ang  mga  nangamatay  na,  hinungdan  nga  nakahukom  na lang  ang  Comelec  nga  wagtangon  kini.

Ambot kun  ngano  bitaw  nga wa man  maghunahuna  ang taga Comelec  sa  paghawan  sa listahan  sa mga  botante. Kasagaran  kanila  mga  abogado  nga  sayon  kaayong  makahimo  og  paagi     aron  makorehian  ang  ilang  listahan  sa  mga botante .

Bisan  ang  tukmang  gidaghanon  niini,  angay  nga sutaon  kay nagtuo  ang  kadaghanan  nga  tungod  kay  way alamag  ang taga  Comelec  kinsa  ang  mga  patay na  nga anaa  gihapon  sa   listahan  sa mga  botante, tataw  kaayo  nga  kauban  kini  sa  55 milyones  nga   gipasigwar  sa  maong  ahensya.

Kun ang   hinungdan  mao  ang  ka  way  kasayoran  sa taga  Comelec  kinsa  ang  mga  patay  na  nga anaa  pa  sa ilang  listahan, angay  silang   makig-alayon  sa  registrar’s office  sa matag  lungsod ug  siyudad  sa nasud  sanglit  mao  kini  ang  labing  nasayud  bahin  sa nangamatay  matag  tuig.

Pinaagi  niini  mahawanan  ang  kasamtangang  listahan  sa mga  botante    ug  tataw  nga  mokupos  tungod  kay  mawagtang  na man  ang  mga  ngan  sa  mga  nangamatay  na  nga  botante.