Abuso sa sakyanan

Unsa ni katinuod nga ang sakyanan sa City Hall nga bag-ong gipalit ug gipagamit sa Barangay Babag gigamit kini sa paghatud-kuha sa usa ka bata nga nagtungha diha sa Talamban?

Uy, kapitan Rita Tabal, palihug susiha kuno kining report nga akong nadungog. Ang mireport kanako kaniadtong miaging Lunes sa gabii akong gisugo nga kuhaan og hulagway ang maong pagpangabuso.

Mao kana ang giingon nako ni Mayor Rama nga hayan kining maong mga bag-o nga sakyanan nga gipagamit niya sa mga barangay hayan abusohan lang.

Moingon ang mga barangay nga wala sila’y magamit kun moanhi sa City Hall, apan ang uban diay mogamit niini sa personal nga kalihukan.

Ayaw ninyo abusohi ang maong sakyanan kay gipalit kana sa dakbayan dili aron ipagamit kaninyo paghatud-kuha sa inyong mga bata sa tunghaan.

Wala pa ba kamo matagbaw nga gihatagan kamo og dugang honoraryom sa City Hall matag buwan, unya abosohan pa ninyo ang sakyanan? Ka-abusado gud ninyo!

Dunay kapitan sa barangay dinhi sa dakbayan nga gireport nato dinhi sa Renbor Patrol sa miaging tuig, nakigkita g’yud nako ug miangkon sa iyang sayup.

Na hala, ayaw lang usba Capt. Gigamit man gud niya ang maong sakyanan isip service vehicle kun mo-duty siya sa ospital nga iyang gialagaran.

Gidayeg nako ang usa ka assistant department head sa City Hall nga kaniadto migamit-gamit sa sakyanan sa kagamhanan paghatud-kuha sa iyang bata sa tunghaan kay mipalit na og iyang kaugalingong sakyanan.

Kana maoy buhata ninyo kay dili gayud maayo ang pag-abuso sa kabtangan sa kagamhanan. Unsaon man gud, duna may ubang mga opisyal nga dili mauwaw sa ilang pagpangabuso.

Kun walay mohimo sa pagkampanya batok niining binuang sa uban, makadani pa kini sa ubang opisyal ug kawani sa kagamhanan nga mosundog kaninyo.

Awhagon nako ang katawhan nga abagan ko ninyo paghimo og kampanya. Kun duna moy mga inpormasyon sa illegal nga kalihukan i-text lang nako sa 0933-570-0853.

Pahibaw-a ko ninyo sama sa illegal nga mga sugal, pag-abuso sa butang sa kagamhanan, pagpangabuso sa mga opisyal, pagpangilkil sa mga kawani sa kagamhanan sa dili pa ihatag ang dukomento ug uban pa.

Kami gud nga mga sakop sa media mas epektibo sa among trabaho kun dunay motabang pagpahibalo kanamo sa mga angayan hatagan og pagtagad.

Dili man unta ko ganahan nga mohatag sa akong contact numbers kay daghan ang magbinuang. I-text lang ha kay dili kaayo ko makatagad sa mga tawag kay bisi ko sa akong mga trabaho.

Gawas gud nga reporter ko sa Freeman, nagsuwat pa ko’g lindog ug mga balita sa Banat News, ug reporter pa ko sa DYLA.