Misugod na ang lumba

Nibuto na ang starting gun alang sa lumba sa umaabot nga midterm election. Ang pag-file kon pagsang-at sa sertipiko de kandidatura o certificate of candidacy maoy senyal nga misugod na ang bugnong lugaynon 2013.

* * *

Daghan mga artista ang nangapil sa umaabot nga piniliay. Daghang mga tigpaniid sa politika ang nangutana sa ilang mga silingan: “Sa inyong hunahuna managan kaha ni sila kun wa sila masayud nga sila nailhan sa mga botante tungod sa ilang pagka-artista?”

* * *

Ang publiko sayod na sa tubag niini. Nagtuo ang mga artista nga dako sila’g kahigayonan nga manaug gumikan kay ilado sila ug duna na sila’y gitawag nga built-in advantage.

* * *

Ang ngalang nailhan na maoy gisaligan sa daghan mga kandidato. Bisan klarong wa’y igong kasinatian sa panggobyerno masaligon ang mga ilado nga makapuntos sila’g daku sa iniphanay sa botos.

* * *

Naay mga nagtagawtaw nga kasagaran sa mga kandidatong popular ang ngalan maoy manlusot sa piniliay. Tinuod bitaw ni pero kinsa may responsabli sa ilang kadaugan? Di ba kadto rang nagtagawtaw ra sad?

* * *

Ambot kanus-a pa mausab ning atong kinaiya sa pagpili sa mga kandidato. O mausab pa ba kini?

* * *

TRIVIA. Mangumusta kita sa atong mga higalang magbabasa diha sa Mambaling ug Basak San Nicolas. Salamat sa inyong nagpadayong suporta sa Banat News.