Nabiyuda ni Robredo may purohan?

CEBU, Philippines - Dihang mitaliwan ang Democracy Icon sa Pilipinas nga si anhing presidente Corazon “Cory” Aquino nabaniog ang pangalan ni kaniadto senador Mar Roxas sa Liberal Party isip maoy ilang presidential candidate.

Apan tungod sa maayong legasiya ug pagkatawo ni Cory ug sa banang si anhing senador Benigno “Ninoy” Aquino Jr. nga maoy nakapadasig sa mga tawong gipul-an na sa 20 ka tuig nga diktadorya walay sami nga gituboy sa LP ang anak niini nga kaniadto Senador Benigno Noynoy Aquino III.

Tungod sa maayong gawi ug liderato sa mga ginikanan ni Noynoy bisan pa man sa mga kudeta nga giagian sa iyang inahan gikan sa mga diskuntentong mga opisyal sa militar midaog gyud si Noynoy kinsa mao na karon ang atong presidente sa nasud nga gipiling tawgon lang siyang P.Noy. Dili pa lang dugay, namatay sa usa ka plane crash si Interior Secretary Jesse Robredo sa Masbate. Si Robredo usa sa mga inilang lider sa LP ug adunay kaugalingong brand sa pagka-anti corrupt subay sa polisiya ni P.Noy kinsa nanaad nga sa iyang pamunoan puohon ang kurapsyon ug dad-on ang Pilipinas sa “Tuwid na Daan.”

Sama kang Ninoy ug Cory, si Robredo gitahod ug girespetuhan sa mga tawo dili lang tungod kay siya maoy kalihim sa Department of Interior and Local Government kondili ang pagkamaayo niining kalihim ug ang pagkaseryoso niini sa gitahas kaniya.

Si Robredo bisan sa iyang posisyon pabiling simple ug gani dili kini mauwaw nga mag-tsinelas ug mag-shorts sa iyang paglibotlibot sa komunidad aron makighugoyhugoy sa mga tawo, ingon niining mga klaseha sa mga opisyal sa gobiyerno ang makahaw-as sa Pilipinas gikan sa gikahimutangan niini karon.

Dili kalikayan nga kung nahitabo pang wala makalas si Robredo sa maong aksidente niadtong Agosto 18 dunay posibilidad nga maapil kini sa lineup sa LP. Basin bise-presidente pa gani sa ni bisan kinsang ituboy sa LP pagka-presidente. Tinuod usa ka dakong kawad-on si Robredo sa mga Filipino.

Kung dunay luna sa lineup si Robredo sa LP karong 2013, nagpasabot kini nga nabakante na kini tungod sa iyang pagtaliwan. Duna bay posibilidad nga hulipan siya sa iyang kapikas nga si Atty. Leni Robredo? Ang nabiyuda ni Robredo dili na maihalas pa sa panerbisyo sa publiko tungod kay usa man kini ka abogado ug dunay dakong pahat sa balatian sa mga Filipino nga mosimpatiya sa mga bag-ohay lang nailo sa ilang mga minahal sa kinabuhi.

"Hinumdumi nga dihang namatay si Ninoy, si Cory ang gituboy ug gisuportahan sa kinabag-an; dihang namatay si Cory gituboy si P.Noy; karong wala na si Robredo, si Atty. Leni masusama ba kaha og kapalaran ni Cory ug P.Noy?"