"Noynoying" ni Noynoy sa mga isyu sa nasud

Nagkakunhod ang popularity rating ni Presidente Noynoy Aquino tungod sa kapakyasan sa iyang administrasyon pagsulbad sa mga suliran nga naglambigit og “public welfare.”

Mao bitaw nga misikat pag-ayo kining gitawag og “Noynoying” nga ang gipasabot niini, “walay nabuhat.”

Natayming ang mga survey sa walay hunong nga pagsaka sa presyo sa mga produktong petrolyo nga miresulta sa pagpagmahal sa mga nag-unang palaliton ug pagpasaka sa pletehan. Unya, misagula pa gyud ang brownout sa Mindanao.

Sa tanang isyu, labing gikalagotan sa mga Pilipino ang kapulpol sa administrasyong Aquino paghimo og mga lakang nga mapugngan ang mga higanteng kompaniya sa lana, ilabi na ang gitawag og Big 3 (nga gituohang nagpadagan sa oil cartel) pagpaburot sa ilang kita sukli sa nag-antos nga mga kunsomedor.

Ang gihimo sa Department of Energy (DOE) nga gipanguluhan pa gyud og usa ka Sugboanon nga si Sec. Rene Almendras, mao ang pag-ilad-ilad sa mga Pilipino nga kunohay wala silay puas sa pagbantay sa mga kompaniya sa lana aron dili maalkanse ang mga tawo, apan ang gituohan sa mga militante, ang gobyerno ug ang mga kompaniya sa lana mao lang ang nagsabotsabot.

Sakto ang reklamo sa sektor sa transportasyon nga dili balanse ang polisiya sa gobyerno kay samtang walay gobyerno nga nag-regulate sa oil industry, ang gobyerno estriktong nag-regulate sa industriya sa transportasyon nga dependent kaayo sa industriya sa lana.

Ang nakadaot niining gobyernoha karon ni Noynoy, magsige lang usab og “Noynoying” – magpabuangboang gihapon bisan sa sitwasyon nga piit na kaayo ang katawhan tungod sa katikasan niining mga kompaniya sa lana.

Usa lamang ang maayong himuon sa administrasyong Aquino aron ipamatuod nga wala sila mag-“Noynoying,” ilang seryosohon ang pagsuporta sa lakang paglibkas sa Oil Deregulation Law.

Sama sa miaging mga administrasyon, nahibalo ang gobyerno nga gidumala ni Noynoy nga kanang Oil Deregulation Law dili makiangayon nga balaod ug nakapasamot sa poverty sa nasud. Tungod kay bukas ang industriya sa lana tungod kay gimbut-an sa balaod nga dili sila ma-regulate sa gobyerno, bukas usab ang pagsaka sa inflation rate.

Mismo si Mayor Sherwin Gatchalian sa Valenzuela city nakabantay nga dili diay maayong buhi-an sa “regulating power” sa gobyerno ang mga industriya nga naglambigit sa public welfare.

* * *

Dili na angayang mangita pa og laing kandidato ang Once Cebu sa pagka-gobernador alang sa 2013 nga eleksiyon. Dayag na nga adunay apilyedo nga Garcia ang pakandidatohon pagka-gobernador sa maong grupo.

Kun dili si Kongresista Pabling Garcia, si Cristina Garcia-Frasco ang klarong standard bearer sa One Cebu.

Ang giingon ni Gobernador Gwendolyn Garcia nga ang One Cebu nagpangita pa kinsay pakandidatohon hulip kaniya ug kanang giingon nga magsabotsabot pa ang mga mayor nga sakop sa maong grupo, estorya na lamang na tungod kay usa ka opisyal sa Kapitolyo nagkanayon nga ang pamilyang Garcia gihapon ang magbuot ug modesisyon kinsay padaganon.

Hinuon, dili na bag-o alang kanato ang ingon niining sitwasyon. Matag higayon nga adunay pamilya nga makalingkod sa gahum, makuli kaayo ang pagdesisyon niining ipasa ngadto sa laing tawo ang liderato.

Dili pa panahon nga modesisyon ang mga Garcia pagpasa sa liderato sa lalawigan ngadto sa laing tawo tungod sa giatubang nga mga kaso ni Gob. Garcia.

Hinuon, wala magmahay ang mga mayor sa gobernadora tungod sa kadaghan nga mehoras nga nabubo niini sa kalungsoran. Mao bitaw nga ingon siya kapinangga sa mga opisyal sa kalungsoran tungod sa kadaghan sa iyang mga nabuhat nga kaayohan.

* * *

Dawaton ba kaha ni Totol Batuhan ang hagit ni Kongresista Tony Cuenco nga ikiha siya tungod sa isyu sa health card nga ang desisyon sa Commission on Audit nag-absuwelto man sa kanhi kongresista?

Si Cuenco mihagit kang Totol sa ingon tungod sa sige niya og balikbalik sa isyu kalabot sa TNT (Tommy and Tony) health card. Basta mag-inangat man gud ang eleksiyon, manggawas kining mga isyu batok sa usa ka kandidato.

Kay giisip man ni Totol si Cuenco nga maoy lig-ong kandidato pagka-kongresista alang sa south district, gisentro kini sa iyang pagsaway ilabi na kalabot nianang TNT health card.

Kun nakita ni Totol nga si Cuenco angayang manubag sa maong isyu, bisan human na modesisyon ang COA nga wala siyay salaod nga nahimo, maayong ikiha na lang ni Totol si Cuenco.

Pinaagi tingale sa kiha ni Totol, mahibaw-an kun sayop ba ang desisyon sa COA nga nag-absuwelto ni Cuenco.

Hagit hinuon kini ni Cuenco nga angayang hunahunaon ni Totol.