Ang Semana Santa ug ang Pasko sa Pagkabanhaw

Gihugopan sa pagsaksi ang gipasiugdahang kasaulogan nga Pasko sa Pagkabanhaw ni Ginoong Jesukristo nga gipasiugdahan sa nagkalainlaing simbahang Katoliko dinhi sa Sugbo.

Ang maong kasaulogan sa Pasko sa Pagkabanhaw ni Ginoong Jesukristo maoy nagtapos sa pagsaulog sa Semana Santa karong tuiga nga giisip nga labing malinawon sanglit wala man usab makasinati og dinagkong panghitabo nga naglakip sa aksidente sa kadalanan, pagpanulis ug uban pang krimen nga pagahimoon sa dautang elemento nga mopahimulos sa kahigayonan.

Ang pipila miingon nga ang pundok sa mga dautang elemento sama sa mga tulisan, mangunguot, mangingilad ug mga manglabnihay sa maong mga adlaw sa Semana Santa atua usab sa mga simbahan naghinulsol sa nahimo nilang kasal-anan maoy hinungdan nga walay nabiktima sa maong mga adlaw sa kasaulogan. 

Hinuon daghan usab ang nag-ingon nga sa mga adlaw sa Huwebes Santo, Biyernes Santo ug ingon man sa Sabado Santo daw namingaw gayod ang kinatibuk-ang dapit sa Sugbo.

Matud pa nila nga sa maong mga adlaw nga walay trabaho bisan kun ang kasagaran sa mga Katolikong katilingban atua magyampungad sa pagtambong sa mga kalihokan sa simbahan nga gihan-ay sa kaparian, daghan usab niini ang atua sa ilang tagsa-tagsa ka mga biyahe.

Adunay namauli ngadto sa ilang mga probinsiya ug ang uban usab kanila nga naglakip na sa pipila ka mga opisyal sa kagamhanan ang mipahigayon sa ilang pagbakasyon uban sa ilang sakop sa pamilya sa nagkalainlaing lugar.

Ang pipila kanila didto mopaingon sa Boracay, Baguio, Puerto Princesa sa Palawan ug ang uban milarga ngadto sa gawas sa nasud sa pagpahimulos sa maong higayon nga taas ang mga adlaw nga walay trabaho. Sa kinatibuk-an ang maong mga adlaw sa kasaulogan karong tuiga giisip nga labing malampuson ug malinawon nga gitapos sa Pasko sa Pagkabanhaw nga gihugopan sa katawhan sa pagtambong sa pagpahigayon niini sa miaging kaadlawon.