Maayo tingaleng susihon sa Office of the President ang mga nagkadaiyang opisina nga nanguhong sa Bureau of Customs – Port of Cebu nga walay laing buhat gawas sa pagpang-harass og mga negosyante.
Sa miaging tuig, nabaniog ang Office of the Commissioner (OCOM) nga gikaintapan sa mga negosyanteng importer tungod sa pagpanghilabot nila sa kalihukan sa adwana dinhi sa Sugbo bisan sila mga representante lamang ni Commissioner Angelito Alvarez.
Karong tuiga, gireklamo sa mga importer kining Run After the Smugglers (RATS) nga anaa mag-opisina sa BOC-Cebu sa Pier 6 tungod sa ilang pagpanghilabot sa dili nila trabaho.
Karong bag-o, gipa-isyuhan sa RATS ang mga importasyon sa motorsiklo.
Apan ang rason sa pagpa-alerto niini mao ang kakulangan sa gibayad nga duties and taxes.
Naglibog ko. Hasta na diay ang mga taga RATS mahimo na makapanghilabot sa isyu sa “valuation” sa duties and taxes?
Sa akong nahibaw-an, ang trabaho niining RATS mao ang pagpanggukod og mga smugglers. Mao man gani gitawag kining maong opisina og Run After the Smugglers.
Apan nganong hasta trabaho sa Assessment Division gihilabtan man sa RATS?
Usa pa, sa kadugay na sa RATS diha sa Sugbo, hain naman nang mga smuggler nga inyong gigukod?
Tingale nakigpanagan usab kamo sa mga smugglers mao nga wala gyud kamoy na-prosecute?
Busa, higayon na nga lili-on ni Pres. Benigno Simeon Aquino III kining RATS sa Cebu aron masusi kun nagtrabaho ba gyud kini sumala sa gimbut-an sa balaod ug wala ba sila mo-usurp og trabaho sa uban.
Maayong ipaabot kining sitwasyon sa RATS sa Sugbo ngadto kang Atty. Democrito Barcenas, kinsa dakong haligi dinhi sa Liberal Party dinhi sa Sugbo aron maoy mosumbong ngadto kang Pres. PNoy.
* * *
Ang Chamber of Customs Brokers, Inc. (CCBI) Cebu Chapter gialirongan karon sa mga batan-ong ginsakopan ug gipaabot kini nga makahatag og kabag-ohan sa kalihukan sa mga customs brokers sa Sugbo ug makahatag og tukmang representasyon sa CCBCI-national organization nga nagbase sa kauluhan.
Kini human mapili sa Board of Directors ang mga batan-ong customs brokers atol sa ilang eleksiyon niadtong Hunyo 21.
Pipila ka adlaw human sa ilang BOD elections, nagpili usab sila og mga bag-ong opisyales alang sa termino 2011-2013 atol sa Fellowship Dinner nga gi-host ni Cebu Customs District Collector Ronnie Silvestre sa Allure Hotel sa Mandaue.
Ang napiling presidente mao si Leonardo “Ding” Abay-Abay; Jerry Martinez Jr., Executive Vice President; Jose Jefferson Bajao, VP-Internal Affair; Julwindo Embrado, VP-External Affairs; Carlos Barte (ig-agaw sa akong amigong si Jun Barte), VP-Professional Development; Erwin Andaya, secretary; Rachel Timtim, Treasurer; Primitivo Mondin, Auditor; and William Dibdib, Press Relations Officer.
Ang lima ka mga miyembro sa Board mao sila si Joel Pimentel (hilomon nga igsuon sa akong kumpareng si Marty Pimentel), Lee de Pio (pag-umangkon kini sa among silingang si Joseph de Pio), Reynaldo Bacus, John Raymund Yap and Vic Alburo.
Si Abay-Abay kinsa 20 ka tuig na nga nag-praktis sa iyang propesyon isip customs broker kauban nako sa Order of Eagles.
Sa eleksiyon sa BOD ug sa mga opisyales, gipangunayan kini og supervise sa nahulmang Comelec nga gipanguluhan ni Dr. Wivina Pumatong, BOC-Cebu Deputy Collector for Administration, ug mga miyembro nga sila si Emilio Chiu ug Liwayway dela Pieza.
* * *
Kun tinuod kining mga pasangil ni Lt. Col. George Rabusa, grabe diay ka-garapal kining si kanhi AFP chief of staff Angelo Reyes.
Tiaw mo na, sumala pa ni Rabusa, gawas sa P5 milyones niya nga kita matag bulan, nakabulsa pa gyud siya og P50 milyones sa iyang pagretiro.
Grabeha no?
Unya kadaghang mga pordoy ang nag-ilaid sa kalisod kay wala matabangi sa gobyerno.
Ang maong kantidad mahimo nang ipundo sa mga kalihukan sa kabaryohan aron mahatagan og puhonan ang mga pordoy nga gustong magnegosyo sa pangiyawat nga makalabang gikan sa kalisod.
Daghan kaayo karong mga tunghaan nga nanguga ug nanglutaw atol niadtong pagbahabaha, apan wala matabangi sa gobyerno tungod lagi kay walay pundo.
Unya, ang mga tawo lang nga anaa sa puwesto ang nagpahimulos og pamulsa sa maong kantidad sa kuwarta.
Kun tinuod ang gitug-an ni Rabusa, unsa kahay gigamitan ni Reyes sa iyang kuwarta nga hilabihan man kadako niini. Wala ba kaha siya mahadlok nga sa ngadto-ngadto mahibaw-an ra gihapon ang iyang ka-suwapang sa kuwarta ug mag-antos ra gihapon kun patubagon siya niini.
Dili lang una hinuon ko moapil sa pagtuo nga hasta sa mga higanteng kompaniya sa lana si Reyes nakakuwarta usab kaniadto.
Tiaw mo na, hilabihan na nga nakasinggit ang mga Pilipino tungod sa kamahal sa mga produktong petrolyo apan kun adunay pormal nga reklamo, si Reyes ang mag-una-una og depensa kanila, inay labanan ang mga tawo nga midangop sa gobyerno.
Nahinumdom pa ko sa nahitabo nilang kanhi NEDA chief Ralph Recto. Si Recto nangugat og expose nga ang Petron, Shell ug Caltex grabeng nakapaginansiya sa ilang baligyang krudo ug gasoline nga nagbalor og P8, apan si Reyes hinuon ang nakig-away kang Recto nga kauban ra man unta sila sa administrasyong Arroyo.
Apan nagduda usab hinuon ko nga pamolitika lang kadto kang Recto kay paingon man kadto siyang modagan pagka-senador.
Karon nga senador na siya, bisan tig-ik na lang ni Recto batok sa mga Petron, Shell ug Caltex, dili na gyod madunggan.