Pasakit sa Semana Santa

Ang Domingo sa Pasyon mao ang unang adlaw diin atong pagabuksan ang tinuig nga mga balansayon sa Semana Santa. Tukmang higayon sa pagpamalandong sa pagpasakit sa atong Ginoo nga sa teolohikanhong panlantaw ang nagpasabut og kaluwasan alang kanatong mga masalaypon apan hinuon dili nato mahawa nga ang kamatayon sa atong Ginoo ang nasagulan usab og mga kontrobersiya.

Apan daghan ang mga pasakit sa semana santa alang kanatong tanan.

Una, kini tungod sa nasinating Global Warming. Ikaduha, ang krisis sa panginabuhian, Ikatulo ang politikanhong panagbangi sa ubang mga politiko ning atong katilingban. Ug ang ikaupat, kita mismong mga katoliko nga nahimong daw kabahin na lang sa atong mekanismo nga sa matag abot sa higayon nga sama niini, mangadto kita sa mga simbahan apan subo lang kaayo sabton nga kadaghanan nato kutob lang gyud dinhi.

Alang kanamong mga pari, ang semana santa mao usab ang tukmang higayon sa pag-alinggat nga diha sa pagpakompisal sa katawhan kami ang mas nagkinahanglan pa sa maong sakramento.

Nga diha sa among pag-isa sa krus panahon sa Biyernes Santo ang makaamgo nga nahimo kaming kabahin sa pundok nga milansang kang Kristo.

Apan lagi, atong hinuklogan nga ang mga pasakit nga atong nahiagoman tinuyoan man o dili ang magdala kanato ngadto sa paghamtong sa atong pagtuo.