Hantak sa Catmondaan

"Good day. Naay sugal nga hantak diri sa Catmondaan, Catmon, Cebu. Kun motawag mi sa mga police wa may madakpan kay naa may police nga mangayog tong sa naghantak. Unsaon na lang pagsumpo ang hantak diri?" - - 0905-3692409

Lisod gyod sumpoon ang sugal diha sa inyong dapit sa Catmondaan, partikular na ang hantak, kun tinuod nga may polis nga mangayog tong sa mga sugarol sa maong lugar. Kun tinuod nga mangayog tong ang maong polis, -- posibleng protektor kanang polisa sa sugal. Pait!

Angayan ilhon o nganlan ang maong polis. Labing maayo nga masusi sa iyang immediate superior ang kalihokan sa maong polis.

Labaw sa tanan, mas maayong maaksiyonan na kanang sugal nga hantak sa Catmondaan ug masumpo kini sa hingpit. Aksiyoni!

* * *

"Maayong adlaw, Sir. Naa lang koy isumbong. Diri sa Opon merkado naay lalaki nga taas, daot og lawas ug itom og pamanit. Magsige man siyag pangayog kuwarta sa mga tawo. Mamugos ra ba. Baskog pa kaayog lawas ning tawhana." -- 0908-5662597

Isumbong kana ninyo ngadto sa mga barangay tanod o ba kaha sa mga polis aron mabadlong nila kanang tawhana.

Ngano god intawon nga magpangayo man lang siya’g kuwarta sa mga tawo nga baskog man kaha kanang maong lalaki? Binuang nang iyang gihimo. Usa ka illegal. Patrabahoa nang tawhana!

* * *

Sir, sayop gyod sa LTFRB nga ang us-os sa plite 50 sentabos ra. Naa man goy ubang driver nga tagoan ang 25 cents aron walay ikasulti. So, automatically P8 ilang fare sa jeep." -- 0920-4199555

Sa laktod nga pagkasulti, walay epek ang 50 sentabos nga rollback kay gawas nga wala motuman niini ang mga PUJ driver, gamay ra sab gyod kaayo ang maong us-os sa plite.

Maayo lang gyod sila kun pasaka sa plite kay dinagko ang layat. Pero kun paus-os gani, inot sila kaayo.

* * *

 (Sumbong ug reklamo? Text sa 0910-8105522).