Nagpaluyo sa tigbakay

Gikan sa cell. no. 0929-5727375: "Naay polis diri sa mao sa Pook, Talisay City nga baga kaayo og nawong. Siya maoy nagpaluyo sa tari diri kada Sunday. Ambot ug nganong nagpaminaw man lang ang iyang labaw. Apil seguro sa bahin kay kada tari naay polis nga moari. Abi namo og manakop na sila. Dili diay kay human og dawat sa soburno mobalik ra man dayon sila sa ilang agi. Delikado kaayo sa mga bata ang tari kay wala may ali ang dapit nga ilang gitarian." -- (Sent: 07:05:32 pm--May 17, 2008)

Kun wala ko masayop sa akong pag-analisar sa iyang text, tigbakay ang buot ipasabot sa texter. Ug kun tigbakay man, posibleng illegal ang kalihokan. Aduna man usay tigbakay nga mahimong legal kun makakuhag permit ang nagpasiugda. Labina gyud kun dunay pista.

Angay ilhon ang polis nga maoy nagpaluyo sa illegal nga kalihokan. Sa higayon nga mamatud-an nga siya nalambigit sa illegal nga buhat, angay gyod siyang pahamtangan og tukmang disiplina. Hinaot unta nga himoan kinig pakisusi sa kadagkoan sa Talisay PNP.

* * *

"Good PM, Sir. Naa gyoy problema sa among dapit diri sa brgy. Lagtang, Talisay. Daghan gihapong video karera diri. Wala gyod masulbad sa hingpit." -- 0909-2219073 (Sent: 07:08:48 pm--May 17, 2008)

Sa akong nabalitaan, nagpadayon hangtod karon ang paghingusog sa kampanya batok video karera diha sa dakbayan sa Talisay.

Aron maaksiyon kanang operation sa video karera sa inyong dapit, labing maayo nga mo-report kamo ngadto sa inyong brgy. officials o ba kaha sa brgy. tanod.

Basin diay kun walay kasayoran ang inyong mga opisyal sa barangay mahitungod sa nagpadayong kalihokan sa video karera diha sa inyong lugar maong wala pa matapos ang malipayong mga adlaw sa operators ug caretakers niini.

Mahimo sab nga modiretso mog taho ngadto sa kapolisan sa Talisay. Atong paaboton ang dinalian nilang aksiyon batok niini. Abagan nato ang atong mga tinugyanan aron mas madali ang pagkab-ot sa kasulbaran sa bisan unsang buhat nga supak sa mata sa balaod.

(Sumbong ug reklamo? Text sa 0910-8105522)