Gisaulog karon ang Cebu Medical Week nga gipasiugdahan sa Cebu Medical Society. Kining maong kasaulogan wala kaayo kahatagi’g igong publisidad busa daghan ang wala masayod niini.
Angay’ng pahalipayan ang CMS sa ilang pagsaulog niining Cebu Medical Week tungod kay kini mipakita sa ilang pagtagad sa panglawas sa atong komunidad.
Ang CMS nakatabang og dako sa pagpalambo sa propesyon medikal pinaagi sa paggiya sa mga sakop niini ngadto sa maayong pagpanambal ug sa pagpatuman sa mga lagda nga angay nilang sundon.
Kami mipahalipay sa CMS atol sa kasaulogan sa Cebu Medical Week uban sa panghinaut nga magpadayon ang maayong pag-alagad niini dili lang sa mga sakop kundili usab sa tibuok komunidad.