Sa may ilang bansa na aming nasapit
Ang Isla ng Hong Kong ay kaakit-akit;
Doon ay nakita magandang paligid
Kung kaya pasyalan nang maraming tourists!
Ang Hong Kong Disneyland – isang paraiso
Na kagigiliwan ng bata at lolo;
Mga palarua’y malinis at bago
At walang basura na nagkalat dito!
Sumunod na aming pinuntahang lugar
Kay taas na pook ang ngala’y Ocean Park;
Ang pagtungo roo’y malayo’t mataas
Ang aming sinakya’y bantog na cable cars!
Matarik na bundok, malawak na dagat
Ang aming tinawid na kagulat-gulat;
At doo’y napansing kabado ang lahat
Dahil sa pangambang kami ay bumagsak!
At itong Ocean Park nang aming marating
Ay kay dami palang doo’y panoorin;
May mga laruang malinis – matulin
Kaya mga apo ay aliw na aliw.
Doo’y naroroon yaong Ultimate Reef
Higanteng aquarium na parang daigdig;
Iba’t ibang isda roo’y mamamasid
Mayro’ong barakuda, may pating, may pusit!
Habang iniikot malaking aquarium
Parang gusto naming tumira na roon;
Doon ay tahimik walang mga maton
Walang terorista’t pulitikong kangkong!
At saka sa Hong Kong doo’y may subway train,
Sa saglit na sakay malayo ang dating;
Nakapagtatakang nang ito ay gawin
Nalagyan ng riles lugar na kay lalim!
Ang huling sinakyan ang tawag ay Peak Tram
Paakyat sa bundok – mataas na lugar;
Pagsapit sa dulo ay mapagmamasdan
Na ang buong Hong Kong maganda’t mailaw!