Kagahapon atong gihisgutan dinhi ang kabililhon sa atong Bandila ug ang kakuwang sa respeto nga gihatag niini sa uban tang kaigsuonan.
Atong gihisgutan ang Bandila kalabot sa kasaulogan sa atong Independence Day kun Adlaw sa atong Kagawasan.
Sumpayan ta kini sa paghisgut sa atong National Anthem kun Nasudnong Awit diin sama sa atong Bandila wala kaayo makaangkon og hingpit nga pagtahod sa atong mga kaigsuonan.
Adunay balaod nga nagsilot ngadtos mga tawo nga magyagayaga kun magbinuang sa pagkanta sa National Anthem apan naa gihapoy pipila ka mga singers nga ilang kantahon ang Nasudnon Awit sukwahi sa lagda nga gipatuman sa balaod.
Hatagan ta og igong respeto ang Nasudnong Awit kay dili lang ang kasaysayan sa atong nasud ang ania dinhi kun dili usab ang mga mithi nga gisunod ug gipakamatyan sa atong mga bayani.