Ngayong summer

Ngayong summer ay gusto kong makarating sa Africa

upang doon ay puntahan ang disyerto ng Sahara;

doon kaya’y kasing-init nitong ating pulitika

na sa tuwing may eleksyon may dayaa’t patayan pa?

Ngayong summer nais ko ring ang Siberia ay masapit

upang doo’y obserbahan kung tunay nga na malamig;

doon kaya’y kasinlamig nang maraming mababait

na ang buhay ay inagaw ng kaaway na terrorists?

Ngayong summer dalangin kong sana kung Mahal na Araw

ay maging matagal sana ito’y maging limang buwan

kung mahaba ay maraming magbabawas kasalanan

na di tulad ng tradisyon na ito ay ‘sang linggo lang!

Ngayong summer ang hangad ko na bagaman at tag-init

araw-araw naman sana humangin nang malamig;

sa ganito ang maraming mangingisda’t magbubukid-

lahat sila ay masigla sa dagat man at sa bukid!

Ngayong summer pangarap kong ang halalang idaraos

maging tapat na damdamin ng botanteng maka-Diyos

na ang bawa’t boto nila ay ibigay nang mataos

sa lahat ng kandidatong sa bansa ay maglilingkod!

Ngayong summer gusto ko ring sa halalan ay bumoto

pagka’t ako’y may napili na mabuting kandidato‘-

ngunit ako’y nangangambang di pa tapos ang termino

itong aking sinamahan – anak pala ng demonyo!

Ngayong summer ay gusto kong makarating sa Boracay

upang doon ay makita ang masayang bakasyunan;

sa buhanging puti roon at bughaw na karagatan

masinag ko ang malinis na konsensya nitong bayan!

Ngayong summer ay gusto kong magbakasyon sa probinsya upang doon ay dalawin mga dating kaeskwela;

sila kaya’y nangasaan – sila kaya ay buhay pa ?

baka sila’y nangamatay nang sa Quezon ay bumaha?

Ngayong summer hangad ko rin na masapit ang Mindanao

upang doon ay makita ang buhay ng mamamayan –

sabi’y Muslim at sundalo walang tigil ang patayan

gayong sila’y magkapatid – iisa ang lahi’t angkan!