Kaniadtong miaging Sabado gibanhigan patay si Abra Congressman Luis Bersamin Jr. sa gawas nga bahin sa Simbahan sa Mount Carmel didto sa Quezon City human miluhod og kasal sa iyang pag-umangkon. Anggulo nga gisubay sa kapulisan, politika. Kaniadtong Lunes, panimalay sa usa ka Mayor sa Abra, Mayor Guzman gisunog. Motibo nga gisubay sa mga naghimo og pakisusi, politika.
Sa wa pa banhigi patay si Kongresista Luis Bersamin Jr., wa na mahitsura ang sakyanan ni kongresista Dodot Jaworski human kini tamni og bomba, maayo na lang kay nakalingkawas ang kongresista sa sanggot ni kamatayon. Pasiunang imbestigasyon nga gihimo sa kapulisan nagtumbok nga politika gihapon ang nagpaluyo sa maong pagpananum og bomba sa sakyanan sa kongresista.
Kining tanan timailhan lamang nga mibukal na gayod ang kawa sa politika. Ang mga panghitabo timailhan lamang nga dugoon ang umaabot nga piniliay? Mao nga manghinaot kita nga ang atong mga politiko dili unta mogamit sa dautan nga pamaagi sa ilang pagpapili.
Dunay mga pagduda nga dili na mahinayon ang Asean Summit ug kon mahinayon man ugaling kini dili na dinhi sa Sugbo kon dili adto na sa laing dapit. Dili makatarunganon ngadto sa mga Sugboanon ug sa katawhang Pilipinhon kon dili ihinayon ang Asean Summit kana gumikan kay dako na kita og nagasto sa pagpangandam alang sa maong kalihukan. Kon dili idayon ang Summit, dili kini makiangayon ngadto sa mga tawo nga misakripisyo aron lang magmalampuson ang maong kalihukan. Dili kini makiangayon sa mga tawo nga mipatulo sa ilang mga luha kay nawagtangan og panimalay kay gipangdemolis aron limpyo kunohay ta nga tan-awon sa atong mga bisita. Hinuon dako ang akong pagtoo nga mahinayon gayod ang Summit dinhi sa Sugbo sunod tuig kay pipila naman ka Head of State ang mipadayag sa ilang pag-uyon sa bag-ong schedule.