Si Dondon "Supremo" Sultan nga lumad nga taga Labason, Zamboanga del Norte, milangkat sa world boxing Foundation (WBF) title pinaagi sa unanimous decision batok ni Eddie "Psycho" Delic nga usa ka Australiano.
Si Delic maoy defending champion ug maoy gipaboran sa mga eksperto nga maoy modaug sa away.
Angay sad unta nga atong hatagan og pasidungog ang atong mga boksingero nga makapakitag maayong labok sa gawas sa nasud -- sama ni Manny Pacquiao sa bag-o pa kini sa iyang boxing career -- aron kahatagan sila og inspirasyon sa pagpaningkamot nga makab-ot ang dugang kadungganan di lang alang sa ilang kaugalingon kundili usab sa atong nasud.
Si Sultan, ang bag-ong kalibutanong kampiyon nga Pinoy, nibalik dinhi sa Sugbo adtong Domingo diin ang nisugat kaniya mao ra ang mga taga SGG Sports Promotions nga maoy nag-atiman sa iyang karera isip boksingero.