Bato nga tapol kuno

Usa ka magbabasa niining ubos kong lindog mi-text kanako aron pagsumbong sa iyang kasinatian mahitungod sa pagpangilad nga batong tapol (kuno) maoy gamiton sa mga suspek sa paglingla sa ilang prospek.

Ang iyang text nag-ingon: "Nailad ko nianang mga tawo sa may kilid sa skywalk. Nagbaligya kuno sila og bato nga tapol. Naa siyay kauban nga nagpaniid, tapos manghagad nga ilang ipanghatag ang batong tapol. Pero maningil ang iyang kauban og tag P10.00. Unya manghatag kunog numero sa jai alai. Usa ko sa nahatagan sa tapol nga bato. Paduolon mi nila, ang tanan gyod nga nahatagan og bato nga tapol. Manghatag tuod silag numero sa jai alai kuno. Wala ko nidawat kay dili man ko sugarol. Nangayo lang sila nako og hinabang. Pero dili modawat og P10.00 kay P50.00 gyod ang ilang gusto." -- 0910-3615930

Maayo unta kadto kon imong gi-specify kon asa nga skywalk nag-operate kining maong mga tawo. Klaro nga dakong tinonto kining ilang gihimo. Binuang! Usa ka modus sa mga badlongon sa katilingban. Angay gayod nga magbantay niini ang atong kaigsuonan kay mahimong mag-operate kini sila sa bisan asang dapit.

Para asa man kuno ang bato nga tapol? Unsa may kagamitan sa maong bato? Ug klaro ang panglingla kay sa sinugdan ipatuo man nga ipanghatag lang apan maningil man diay og P10.00 sa higayon nga madawat na sa ilang prospek ang bato nga tapol? Asa ka tapol? Dako kining binuang!

Unya, unsa to? Manghatag sila og numero sa jai alai? May jai alai pa ba karon. Ambot lang! Pero kon dili modawat sa numerong ilang ipanghatag, pangayoan nila og hinabang. Unya dili mosugot kon P10.00 ray ihatag kay P50.00 gyod. Pastilan, nayabag na man tingali kining mga tawhana!

Pagbantay kamo niining mga tawo nga manghatag (kuno) og bato nga tapol (lain pang kuno). Tapolan kanang mga tawhana mao nga midangop na lang sila sa pagpangilad aron makasapi. Mao nga ayaw kamog padani nianang mga tawo nga adunay ipanghatag apan sa himan-himan pa pabayran man diay. Ayaw kamo palingla niining maong mga badlongon sa katilingban.

* * *

(Sumbong ug reklamo? Text sa 0910-8105522)