Sukdanan sa kalambuan?

Daghan ang moingon nga progressive na kuno kaayo ang Sugbo tungod kay duna na tay SM ug Ayala, ug ubang mga mall nga nanuybo sa dakbayan sa Sugbo.

Nga kuno heavy na kaayo ang traffic, daghan na kaayong tawo, ug daghan na kaayo kitag mga activities dinhi. Kining tanan nagtimaan sa usa ka malambuon nga dapit.

Moba? Mao ba ni ang ilhanan sa usa ka malambuon nga dapit? Usa lang tingali ni. Alang nako, di man ko ekonomista, ang dakung ilhanan sa usa ka mauswagong dapit, mao ang kahimtang, ang poverty level sa katawhan in general.

Unsa man, daghan bang squatter? Daghan bang makililimos? Daghan bang waay trabaho? Ug ang mga sweldo sa adunay trabaho, minimum ba? Duna bay kaugalingong panimalay ang katawhan? Makakaon ba sila ka-tulo sa usa ka adlaw -- o tingbon na lang ang pamahaw ug paniudto, ug moinom na lag tubig dayong katoog? Nakapatungha ba sila sa ilang mga anak?

Alang nako, mao ni ang economic indicator sa usa ka dapit. Ug unsa may epekto sa SM ug Ayala ngadto sa taga-lalawigan -- kadtong giingon ni Lito nga mga PROMDI? Nakapauswag ba ni sa ilang panginabuhi?

Natagad ba ang mga panginahanglan sa lalawigan? Na-felt ba ang mga government services didto sa ka-sityohan ug ka-barangayan sa tibuok lalawigan?

Sa laktod, ang pulong progress, ang tingusbawan, nasinati ba ni sa mga molupyo sa country side, ilabina sa mga mountain barangays?

Alang nako, bisag di ko ekonomista, mao kini ang tinuod nga sukdanan sa kahimtang ekonomikanhon sa usa ka dapit. Ug mao ni ang dakung hinungdan ngano nga uyon ko nga buk-on ang lalawigan sa Sugbo, aron ma-sayon ang pagtagad ug pag-atiman sa katawhan didto sa countryside. Apan, sa ako nang giingon dinhi, i-divide ang Sugbo into two provinces lang. Nganong di man mo ganahan ini?