Lahi ang ilang turismo

Duna koy mga higala nga nangadto sa Taiwan sa niaging semana. Puwerte nilang lingawa nga nanghagad sa uban nilang mga higala nga mamalik sila. Labing nakalingaw nila ang kalami ug kadaghan og kapilian sa mga pagkaon, ka-barato sa mga presyo ug kamatinagdanon sa mga molupyo.

Pagtugpa pa lang sa Taipei, gipa-apil dayon sila og raffle (kabahin sa agresibong kampanya sa Taiwan pagdani pagbalik sa mga turista human sa pandemya). Nakadaog ang usa nila og 5,000 Taiwan dollars (?8,640). Nga mahimong ibayad sa mga tindahan, sakyanan, ug ubang panginahanglan.

***

Pag-abot nila sa hotel, wa nay mga kawani sa front desk. Sila ray nagpili sa ilang mga kuwarto pinaagi sa pagtuplok sa computer screen. Human nakapili, automatic nga gi-printa ang ilang key cards. Uban ang tugon nga ang key cards magamit para sa libreng pamahaw sa hotel.

Wa sila pasaligi og pamahaw sa pag-book sa hotel online sa wa pa mobiya sa Sugbo. Maong nahinangop sa bonus nga sinugatan. Natagbaw sila sa lugaw nga abunda og mga sagol ug ubang lamian nga mga putahe sa nisunod nga mga buntag.

***

Gilibotan ang ilang hotel og mga kan-anan. Ang silingang kadalanan (nga pulos lapad og sidewalk) namungingi og dugang kan-anan. Kasagaran usa ray pultahan ug nag-operate sud sa daghang katuigan (30 anyos ang usa nga nasudlan). Ang kinatas-an og linya maoy kinalamian.

Naksuway sila og shabu-shabu nga sa app sa telepono ra maka-order. Tag-?1,000 ang bayad kada usa ug maka-order bisan unsa sud sa duha ka oras. Robot ang nihatod sa ilang orders. Labihan nilang busoga.

***

Sa pagpauli na, sayon silang naka-book og van nga nikuha nila sa hotel paingon sa airport ug hapsay ang boarding sa flight balik sa Sugbo. Nagkauyon sila sa kamahigalaon sa turismo sa Taiwan kay sa atong kaugalingong nasud.

Way nangilkil nila sa airport. Way nanglubag nila sa plitehan. Way mga polis nga lain og tinan-awan. Way nagsunudsunod nila aron kapanguwartahan. Wa silang kadungog nga ang gobyerno nigasto og minilyon ka dolyar paglusad og bag-ong tourism slogan. Wa sila kabantay nga ang Tourism bureau chief nagpaukyab sa iyang priority project nga pag-inugurar og mga kasilyas sa kalungsoran.