Paglingiw sa buhis
Pagsugod ning buwana, atol sa pagtimaan sa iyang ika-119 nga anibersaryo, ang Bureau of Internal Revenue (BIR) nipasigarbo sa ilang mga nahimo sa unang tuig sa administrasyon ni Presidente Ferdinand Marcos Jr.:
• Nakapasaka sila og 192 ka kasong tax evasion ubos sa ilang Run After Tax Evaders (RATE) program nga naglambigit og P8 bilyones; ug
• Nakaserado sila og 134 ka kompaniya (nga wa moluwat og opisyal nga mga resibo ug invoices ug wa kasumiter og value added tax return) ug nakakolekta og P332.5 milyones ubos sa Oplan Kandado Program.
* * *
Makapadasig nga nakakiha og dul-an 200 ka gipasanginlang tax evaders ang liderato sa BIR nga tinudlo sa presidente nga konbiktado sa tax evasion tungod sa wa pagbayad og buhis sa 1982 hangtod sa 1985 sa siya pay bise gobernador ug dayon gobernador sa Ilocos Norte.
Ambot unsay bation sa mga sinumbong kon mahibawo nga si Marcos wa pa motuman sa sugo sa Quezon City Regional Trial Court (RTC) Branch 105, nga nikonbikto niya niadtong Hulyo 27, 1995, sa pagbayad sa utang nga buhis ug multa.
* * *
Sa di pa mangugat ang iyang trolls nga fake news ang tax evasion ni Presidente Marcos Jr., niang sunod nga mga panghitabo human sa iyang pagka-konbikto:
• Ni-apelar si Marcos sa Court of Appeals (CA); nga
• Nipatigbabaw sa iyang pagka-konbikto niadtong 1997 (pero wa ipahamtang sa CA ang sentensiya nga hangtod sa unom ka tuig nga pagka-priso);
• Ni-apelar si Marcos sa Korte Suprema; pero
• Iyang gibakwi ang apelasyon sa 2001; maong
• Nahimong final ug executory ang iyang pagka-konbikto.
* * *
Masaligon ang BIR nga mapun-an og P8.3 bilyones ang nasudnong panudlanan kon makonbikto o mobayad ang mga sinumbong. Wa ra na sa kumingking kon ilang makolekta ang kinadak-ang utang sa buhis. Nga di kinahanglang magbitbit pa og mga kandado, ni mopasaka pa og mga kaso, kay hagbay rang nahukman sa Korte Suprema.
Ang P23 bilyones nga estate tax sa pagkamatay ni Ferdinand Marcos Sr. niadtong 1989 gi-isnab sa presidente ug sa iyang pamilya sud na sa dul-an upat ka dekada. Maong sa kataposang demand letter sa BIR niadtong Disyembre 2021 niburot na ngadto sa P203.8 bilyones.
- Latest
