Di diay alang sa tanan
Samtang malipay unta ta sa pahibawo sa Department of Health (DOH) nga maapil ang Sugbo sa 33 ka dapit sa Pilipinas nga makapahimus sa unang tuig sa pagpatuman sa Universal Health Care (UHC) Law, mas maikog ta sa atong mga silingan. Kay sa tibuok Central Visayas, Sugbo ra ang naapil sa listahan sa DOH.
Maglaway intawon ang mga molupyo sa Bohol, Negros Oriental, ug Siquijor sa paglibre na alang sa tanan sa batakan nga mga pangalagad medikal sugod karong Enero 1, 2020, o upat nga buwan na lang gikan karon.
***
Gipakapinan pa g’yud og insulto sa mga mahikawan nga mga lalawigan ang unang katin-awan ni Health Secretary Francisco Duque III nganong Sugbo ra ang makapahimus: Kay napakyas kuno ang lokal nga mga opisyal sa ilang kaandam na sa pagpatuman sa UHC Law.
Tungod sa tiyabaw sa mga opisyal sa wa maapil nga mga dapit nga mora hinuon silang gipasanginlan nga nagmika sa katungdanan nidalidali og bakwi si Duque nga ang tinuod diay nga hinungdan mao ang kakuwang nila og katakos sa DOH sa pagpatuman dayon sa balaod sa tibuok nasud.
***
Abunda ang iyang mga palusot:
•Kuwang ang budget (wa kaabot og P257 bilyones ang gigahin sa Kongreso ug gitampo sa ubang mga buhatan (sa way paghisgot sa dakong alkanse sa PhilHealth tungod sa mga eskandalo);
•Kinahanglan pang magtukod og dugang mga ospital sa gobyerno sa mga dakbayan ug kalungsoran; ug
•Kinahanglan pang manguha og dugang mga doktor, nurse, ug ubang health workers aron maka-atiman sa dugang mga pasyente.
***
Dihang gipanday pa sa Kongreso ang UHC, wa g’yuy taga DOH ni Malakanyang nga naghisgot nga may mag-una ug may ma-uwahi diay sa pagpatuman sa makasaysayanong programa. Maong way nagdahom nga sa unang tuig sa pagpatuman sa UHC Law pa-ibugon lang ang mayoriya sa mga molupyo sa Central Visayas ug ubang bahin sa nasud.
Atubangan ning wa pagtuman sa orihinal nilang pasalig unsa man ang garantiya nga mahatag ang tanang batakan nga pangalagad ug mga tambal ug nga di mangadlawon ug magabhian nga mag-antos sa uwan ug init ang mga pasyente samtang maglumbay gawas sa mga tambalanan pagpaabot sa ilang turno kay labihang daghana nang naka-una nila?
- Latest
