P16 bilyones nga tulubagon
Nipasidaan si kanhi Cebu City Mayor Tommy Osmeña nga mas seryuso ang implikasyon nga atubangon sa mga opisyal sa Dakbayan sa Sugbo kon ipasar gyod ang P3.32 bilyones nga supplemental budget nga gipangayo ni Mayor Mike Rama. Bisan wa pa maklaro ang legalidad sa pagbaligya sa luna sa South Road Properties.
Matod ni Osmeña labihan kadako ang tubagunon nilang Rama, Bise Mayor Edgar Labella ug mga konsehal kon mapamatud-an sa korte nga ilegal ang laktod nga pagbaligya sa 45.2 ka ektaryang luna sa SRP pinaagi sa subasta nga nadaog sa Filinvest Land Inc. ug sa consortium sa Ayala Land Inc. ug SM Prime Holdings Inc.
***
Atol sa iyang pagtambong sa Arangkada sa DYAB Abante Pa, Bisaya!, si Osmeña niingon nga natay-og na man gani ang mga opisyal sa City Hall nga gi-disallow sa Commission on Audit ang calamity assistance niadtong Disyembre 2013, mas malisang ang mga opisyal kon makuwestiyon ang dinalidali nga paggasto sa mas dakong halin sa luna sa SRP.
Nipasabot si Osmeña nga P80 milyones ray gigahin sa calamity assistance ug gisaw-an pa sa mga opisyal uban sa 4,000 ka kawani sa City Hall. Sa pikas nga bahin, P16.6 bilyones ang halin sa SRP ug silang Rama ug mga opisyal ra ang manubag.
***
Subling gipanghimakak ni Osmeña siya ang nagsugo ni Atty. Romulo Torres, ang nipasaka og kaso batok sa pagkahalin sa luna sa SRP. Matod ni Osmeña wa siya makaila ni makasulti ni Torres. Nikomedya pa gani nga mahimong nakaila siya sa tinuod nga utok sa labing uwahing kaso nga gipasaka batok sa SRP.
Iyang gitumbok nga posibleng si Barangay Kapitan Joel Garganera sa Tinago ang tinuod nga utok sa kaso nga gipasaka ni Torres. Iyang gihinumdoman nga si Garganera ang nipasaka og kaso batok sa SRP atubangan sa Regional Trial Court, dayon sa Court of Appeals, hangtod nga niabot sa Korte Suprema.
***
Gitataw ni Osmeña nga malampuson niyang gipanalipdan ang SRP di lang gikan sa kaso ni Garganera kon dili gikan sab sa House inquiry nga gipasiugdahan ni kanhi kongresista Pablo John Garcia ug sa Senate Inquiry nga gihulga ni kanhi senador, karon Toledo City Mayor, Sonny Osmeña.
Wa kahinumdom si Osmeña nga nanalipod si Rama, bisan kausa, sa SRP. Matod niya gipasagdan lang siya ni Rama sa pagmatuod nga legal ang mga transaksiyon sa SRP ug nga makaayo sa mga Sugbuanon ang proyekto. Maong gisakitan pag-ayo si Osmeña karon nga gawas nga giangkon nang Rama ang SRP nipadayag pa gyod sa iyang determinasyon paghurot pagbaligya sa tanang nahibiling luna aron nga ikagasto sa bisan unsa lang niya nga mahunahunaan nga gastohan.
- Latest
