Oxygen nga makamatay

Angay na gayud nga magpakabana ang kadagkoan sa Food and Drugs Administration ug susihon nila ang mga tangke sa oxygen nga gigamit sa mga ospital alang sa ilang mga pasyente.

Mura'g motuo ko nga daghan sa mga tangke nga puthaw nga gisudlan sa oxygen gitaya na ang ilawom niini ug resulta, maapil og hingos sa mga pasyente ang taya.

Mao kini ang nahitabo sa usa ka pasyente didto sa Dagupan City nga namatay kay human gi-oxygen, samtang gihubak, namatay na hinuon kay ang iyang baga napuno sa pino kaayo nga taya.

Pagsulod sa dalagita sa ospital ang mga ginikanan may nakuha na daan nga Chest X-Ray, clear ang results. Apan human namatay ang babaye diha nga gigamitan sa oxygen, ang iyang baga puwerte'ng daghana nga pino kaayo'ng taya.

Gigabas ug gibuak ang cylinder tank. Didto nakita nga puwerte'ng daghana diay'ng taya sa sulod sa tangke. Nakahanggap ang dalagita og taya. Dili ba angay kita nga mahadlok?

Kinahanglan nga ang mga cylinder tanks nga hinimo lang sa ordinaryo nga puthaw, ilisan kini og mga tangke nga hinimo sa stainless aron nga dili tayaon.

Sa ingon nga paagi, malikayan nga ang pasyente imbes magpatambal aron maayo sa iyang sakit, mangamatay na hinuon.

* * *

Dunay gipublikar nga resulta sa survey nga giingong gihimo sa usa ka mantalaan didto sa kaulohan. Kini nagpakita nga anaa na sa kinaiwitan si Vice President Jejomar Binay sa mga posible nga molansar pagka president.

Wala ko kapugong sa pagkatawa nga nakakita sa mao nga survey results. Tiaw mo, sa una si Binay nag-una sa mga survey unya karon anaa na siya sa ikog?

Nakita usab nga si Grace Poe ikatulo na lang nga taas og ratings kay ang nag-una mao na si DILG Secretary Mar Roxas ug gisundan ni Davao City Mayor Rodrigo Duterte.

Makatuo ko sa survey kay wala na ganahi ang mga tawo kang Grace Poe human sila makasabot nga presidente g'yud ang iyang giambisyon.

Bisan ako, wala na ko ganahi ni Grace Poe. Kay wala man siya'y hibangkaagan sa pagpadagan sa kagamhanan, bise presidente usa ang angay kaniya.

Dili 'sab maayo nga moderitso siya pagka presidente uy. Ang ako lagi nga sanglitanan mao nga kun padag-on nato si Grace Poe, tabla ra nga misakay kita og bus, nga ang atong gipa-drive mao ang tawo nga dili makamao momaneho.

Sugot mo ana?  Lagmit mangamatay ta. Kay nasud man ang buot dumalahon ni Grace Poe nga kuwang pa og kasinatian pagdumala sa kagamahanan, lagmit masukamod ang atong nasud.

Bise lang g'yud unta siya ni Mar Roxas nga base sa survey maoy labing sikat.

* * *

Mura'g maalkanse sa Partido Liberal diha sa Mandaue kun mosipyat si Gobernador Hilario Davide III pagpili og standard bearer pagka mayor sa Mandaue.

Wapa pa makahukom si Davide kun kinsa kanila ni Konsehal Lolypop Ouano-Dizon ug Kongresista Luigi Quisumbing ang paluyohan sa Liberal sa paglansar pagka mayor.

Kun masipyat si Davide ug si Luigi ang iyang himoong standard bearer pagka mayor sa Mandaue, ang mga dumadapig ni Lolypop dili mosuporta ni Davide.

Dili ikalimod nga si Lolypop mas daghan og supporters kay ni Luigi tungod kay kadtong mga "die hard" g'yud sa pamilya'ng Ouano dili man g'yud makatalikud kaniya.

Ang mao nga mga supporters ni Lolypop dili na mobotar kang Davide kun si Luigi maoy iyang pillion, ug hayan adto na kini mosuporta sa kontra ni Davide.

Posible pa gani nga apektado ang kandidatura ni Mar Roxas diha sa Mandaue. Mao nga ang pagpili kun kinsa nila ni Luigi ug Lolypop, angay'ng hinuktokan pag-ayo ni Davide aron dili siya masayop.

Si Lolypop 'sab wala g'yuy rekord nga nakahimo kini og kurapsyon atol sa iyang pangatungdanan, apan si Luigi gikuwestyon sa Commission on Audit ang paggasto niya sa iyang milyon ka pesos nga PDAF.