Digital nga simhot sa sakit
Niay masaaron nga teknolohiya nga makapalambo sa atong katakos pagtambal sa labing grabeng mga sakit pinaagi sa pagpasidaan nato sa labing unang mga timaan aron nga labing sayo sab nga matambalan. Ang nabantog nga katakos sa mga iro ug iring ug ubang mga hayop pagsimhot ug pag-ila sa mga kemikal nga mohungaw gikan sa tawhanong mga sakit karon mahimo na sa gamayng computer chip.
Ang microchip spectrometer technology nga namugna ni Dr. Andrew Koehl gigamit na karon sa higanteng mga kompaniya sa lana ug pagkaon tungod sa katakos pag-ila sa mga kemikal sa palibot. Naningkamot si Koehl nga mapagamyan pa gyod ang chip aron nga masukip na sa mosunod nga henerasyon sa mobile phones.
* * *
Pagtabang pagbadlong sa terorismo maoy orihinal nga tumong ni Koehl sa paghimo sa computer chip. Human sa pangatake sa Al Qaeda sa World Trade Center ug Pentagon sa Estados Unidos niadtong Septiyembre 11, 2001, nagsugod pagtuon si Koehl sa security applications nga makasimhot og mga eksplosibo, makahilong mga kemikal ug ubang mga hulga.
Nabalaka si Koehl nga di paigo ang naandan nga kahimanan sa seguridad sa nagkalainlaing kanasuran sama sa x-ray machines ug explosive detector dogs o bomb dogs: Ang x-ray mahimong malutsan sa plastik nga bomba ug ang mga iro mahimong kapuyon o malipat. Ang computer chip maggamit 24 ka oras matag adlaw ug pito ka adlaw matag semana.
* * *
Gipalambo ang teknolohiya ni Koehl sa kompaniya nga Owlstone. Nga nitawag sa kahimanan nga makapahuy-ab nga ngan nga Field Asymmetric Ion Mobility Spectrometer. Matod sa Owlstone ang ilang chip maoy labing gamay, labing gaan ug labing epektibo sa tanang gibaligya nga chemical sensing applications.
Tuod man, nadani na nilang higanteng mga kompaniya sa lana sama sa Shell ug BP ug ang higanteng mga kompaniya sa industriya sa pagkaon, ang Nestle ug Coca Cola. Sunod nga ambisyon nilang Koehl ug Owlstone mao ang pagduso sa chip isip panagang sa sakit.
* * *
Gitumbok ni Koehl ang mga pagtuon nga dunay compounds sa ginhawa sa tawo nga magsilbi nga labing sayo nga timaan sa mga sakit, sama sa kanser, tuberculosis ug hubak. Kon masimhotan sila sa sensor, makapanagang daan ang mga pasyente. O katambalan dayon sa di pa uwahi ang tanan.
Nakiglambigit na silang Koehl ug Owlstone sa higanteng mga kompaniya sa telepono. Nagpatabang sila pagpangita og paagi aron nga mas mapahiyos pa ang computer chip. Sa ingon, masukip na sa smart phones nga manggawas sunod tuig. Kon mahinayon, mahimong motiyabaw ang mobile phone sa imong bolsa sa di pa ka mahinayak paghamong og pan-os nga pagkaon. O mahimong mo-vibrate aron maka-andam nang daan sa nebulizer sa di pa ang sunod nga atake sa imong hubak.
- Latest
