Mga hulga sa China

Kahilas sa China. Apil sa ilang mga hulga kon dili mohunong ang Pilipinas sa pag-angkon sa West Philippine Sea (WPS) ang mosunod nga mga lakang nga gituohan nga makapiang sa ekonomiya:

•         Una, mohunong sila og palit sa atong mga prutas ug ubang mga produkto sa agrikultura;

•         Ikaduha, lisudlisuron kon dili man palayason ang dul-an sa tunga sa milyon ka Overseas Filipino Workers (OFWs) sa mainland China, Hong Kong, ug Macau; ug

•         Ikatulo, did-an ang Chinese tourists pagduaw sa Pilipinas tungod sa hulga sa seguridad apil ang sulbong sa mga krimen.

-o0o-

Unahon natong mga prutas. Tinuod nga ang China mao ang kinadak-an nga merkado sa atong pinya, mangga, saging, ug durian. Himalitan sa mga tindahan ug kamerkadohan sa China ang pinya gikan sa Bukidnon, mangga gikan sa Guimaras, ug saging ug durian gikan sa Davao.

Pero atong klaruhon. Wala ta magpakiluoy sa China pagpalit sa mga prutas. Paborito nila ang atong mga prutas kay mas maayo ang kalidad kon ikumparar sa samang produkto sa ubang kanasuran. Kon mohunong sila og kompra, daghang mga nasud ang motanyag og mas maayong presyo.

-o0o-

Isunod natong OFWs. Makapasubo kon pahimungtan ang mga trabahante sa ilang mga industriya isip mga inhinyero ug mga arkitekto, sa ilang mga pinuy-anan isip tig-atiman sa mga bata ug mga sakop sa pamilya, ug sa mga ospital isip doctors, nurses, ug healthcare workers.

Pero atong klaruhon. Wala magpakilimos ang OFWs. Gikontrata tungod sa katakos dili sa kakabos. Mahasol sila pero makapangita og laing panginabuhi. Mas maglisod ang mga kompaniya sa China pagpangita og alternatibo.

-o0o-

Dayon, ang mga turista. Kay diktadura man ang gobyerno ni Xi Jinping, makadiktar sa destinasyon sa ilang katawhan. Gidid-an nang Chinese tourists sa pagbakasyon sa Pilipinas atol sa administrasyon ni anhing presidente Noynoy Aquino. Imbes maluya, nilambo hinuon ang turismo.

Atong klaruhon. Wala ta magpakiluoy sa lokal ug langyaw nga mga turista sa pagpahimulos sa katahom ug kalingaw sa Sugbo, Panglao, Boracay, Siargao, Palawan, ug Batanes. Hinaot makatsamba nang lokal ug nasudnong gobyerno sa paghimong mas sayon sa pagbiyahe agi sa atong mga pantalan, tugpahanan ug mga terminal. Aron ang mga turista, apil nang taga China, mahigalam. Ug magbalikbalik.