Sinulog ug Santo Papa
Samtang may nitumaw nang mga awhag nga iuswag ang Sinulog Grand Parade nga madungan sa Santos nga Misa nga dumalahon ni Pope Francis sa Quirino Grandstand sa kaulohan sa Enero 18, 2015 ug atubangan sa mga kabalaka nga di mahinayon ang pagduaw sa Santo Papa sa Tacloban City ug Palo sa Leyte nga gihapak na sab sa bagyong Ruby, may nisibaw rong awhag nga iuswag ang pagduaw ni Pope Francis sa atong silingang nasud sa Sri Lanka.
Ang ulohang Colombo sa Sri Lanka maoy duawon sa Santo Papa sa di pa molupad paingon sa Manila sa Enero 15, kapin sa buwan na lang gikan karon. Kon di madayon ang iyang pagduaw sa Sri Lanka may kahigayonan ba nga maapektahan sab ang lima ka adlaw niyang pagduaw sa Pilipinas ug Kabisay-an?
* * *
Nabalaka ang kaparian sa Simbahang Katoliko sa Sri Lanka nga ang tulo ka adlaw nga pagduaw ni Pope Francis nga magsugod sa Enero 13, lima ka adlaw human sa piniliayng presidensiyal, maduhig sa kaguliyang sa politika nga mahimo ganing duguon. Usa nila, si Padre Leo Perera, niingon nga ang nangaging mga piniliay kasagaran gisundan sa kagubot ug busa mameligrong mabulingan ang imahe sa Santo Papa. Giawhag niyang mga obispo sa pagrekomendar sa Vatican nga iuswag ang pagduaw ni Pope Francis.
Higpit nga nagtigi sa piniliay silang Presidente Mahinda Rajapaksa ug iyang kanhi health minister nga si Maithripala Sirisena. Politikanhong mga kaatbang ni Rajapaksa nidason sa awhag nga ilangay ang pagduaw sa Santo Papa.
* * *
Gipasanginlan nila ang presidente sa Sri Lanka nga nigamit sa Santo Papa sa iyang kampanya. Gipabarug ni Rajapaksa sa tibuok nasud ang higanteng billboards sa iyang hulagway uban ni Pope Francis.
Si Rajapaksa nga usa ka Buddhist gipasanginlan nga nanggukod sa mga Muslim ug mga Kristohanon apil na sa mga Katoliko. Buddhists ang kapin sa 70% sa 20 milyones nga populasyon sa Sri Lanka apan ang suporta sa 1.2 milyones ka Katoliko giisip nga mahinungdanon sa piniliay.
* * *
Gitino sa Catholic Bishops Conference of the Philippines nga mahinayon ang pagduaw ni Pope Francis sa Manila ug Leyte gikan sa Enero 15-19, 2015. Gitino sang Cebu City Mayor Mike Rama, chairman sa Sinulog Foundation Inc., nga mahinayon ang Sinulog Grand Parade sa Enero 18.
Si Cebu City Vice Mayor Edgar Labella niingon nga mahimong may kausaban ang Sinulog Grand Parade kon mohukom si Pope Francis nga motambong sa Piyesta Senyor sa Sugbo. Apan gitataw ni Rama nga di na mausab ang petsa sa grand parade. Bisan sa kahigayonan nga maibanan ang mga manan-aw ug nga mahigot ang labing dagkong kahugpongan sa media sa obligasyon sa pagsibya sa mas dakong kalihokan ni Pope Francis.
- Latest
