Unya na ang pamolitika

Husto ang gihimo ni DILG Secretary Mar Roxas nga gibaliwala lang ang pagsaway sa usa ka opisyal sa United Nationalist Alliance nga nagpasangil nga gilaktawan lang sa administrasyon ni Presidente Aquino ang pagtabang sa mga biktima sa bagyo'ng Yolanda sa Tacloban.

Diha'ng gikuhaan si Roxas og reaksyon sa mga sakop sa media didto sa Manila kabahin sa pagsaway ni Tacloban City Mayor Alfred Romualdez, ang DILG Secretary igo lang miingon nga "trabaho muna tayo, bago ang pulitika."

Nindot g'yud kaayo ang gihimo ni Roxas kay ang paghimo'g dugang reaksyon makaagni lang kini og dugang pa nga panagsukliay sa mga pulong og wala nay mahimo'ng trabaho.

Nakabantay tingali si Roxas nga posible nga gihagit lang siya sa kadagkoan sa UNA aron nga malawgaw ang iyang pagserbisyo sa kagamhanan isip DILG Secretary.

Gibutyag hinuon ni Roxas nga ang nasudnong kagamhanan mipagahin gayud og P230 milyones nga pundo alang sa Tacloban City bisan og wala moabag sa nasudnong kagamhanan si Mayor Romualdez.

Masabot kaayo nga si Roxas maoy puntareya karon sa UNA kay posible man nga mao kini ang higpit nga ikasangka ni Vice Presdident Jejomar Binay sa paglansar pagka presidente karong 2016.

Nagpaniid ko sa isyu ug gidayeg nako si Roxas kay gipasanginlan pa siya sa UNA nga maoy mihimo'g paagi nga dauton si Binay ug matud pa nga milusad kini sa Operation Stop Nognog in 2016.

Wala pa g'yud ko makadungog nga si Mar Roxas mitingog sa mga pamasangil batok kaniya. Mao diay, layo pa ang eleksyon ug dili siya gusto nga maapektahan ang iyang trabaho.

Ingon usab unta niini ang ubang mga opisyal sa kagamhanan nga dili magpadala sa mga pagpanglawgaw kanila sa kontra nila sa politika.

***

Samtang nagmaneho ko'g akong sakyanan sa Gorordo Avenue kagahapon sa buntag, nasundan nako ang Patrol 701 sa PNP Highway Patrol Group.

Paingon ko sa opisina namo sa downtown.  Naunhan nako ang Patrol Car pag-abot sa eskena dapit sa Perpetual Soccour Hospital. Pag-GO signal na, nauna na ko sa police patrol car.

Sa diha'ng duol na sa Camp Sotero Cabahug, giunhan ko sa Patrol Car ug gisinyasan nga pahunongon. Nahibulong ko apan mipadaplin ko sa karsada. May misantop sa akong huna-huna.

Gitangtang nako ang akong seatbelt aron makakita sila og kalapasan kay nakahuna-huna ko nga basin kini na ang higayon nga maaktohan nako nga mohimo sila'g binuang.

Gitangtang nako ang akong Press ID. Pagduol sa polis, giingnan ko nga ang akong plate numbers wala kuno'y plate sticker sa tuig 2014. Gipangayo ang akong resibo aron pagsuta kun naka-renew ba ko karong tuiga.

Pagtunol nako, gipangayoan na 'sab ko sa akong driver's license. Kataw-onon ko kay mora'g nangita'g sayop.  Didto ang duha ka polis sa likud sa akong kotse, ambot unsay gipanagsultihan.

Taud-taud miduol pagbalik nako. Igo lang miingon nga gi-check ra kuno nila kay wala ko'y current sticker sa plate number. Pastilan, abi ba nako og masakpan na g'yud nako nga mohimo'g binuang.

Kadaghan na man gud ko makadawat og report nga may mga polis sa Highway Patrol nga kusog kuno'ng mangilkil sa mga drayber. Buyno, basin mga buotan to'ng mga polis nga sakay sa Patrol kagahapon.

Siyaro, kadaghang sakyanan nga walay mga current year sticker ako pa g'yud nga nagkotse ang gipara? Pag-uli sa lisensya nako, ako na lang giingnan nga kanhi deputized agent ko sa LTO ug dili mohimo'g sayop pinaagi sa pagmaneho'g sakyanan nga walay rehestro.

Kun may sad-an man nga ang mga sakyanan walay current year sticker mao ang LTO, ilabi na si Undersecretary Alfonso Tan, nga nagpatuga-tuga og pangulo sa LTO nga dili maantigo mosulbad sa problema.

Ang mga motorista nagbayad para sa sticker apan inigparehestro nimo walay ikahatag. Igo lang patakan og "No available sticker" ang imong resibo. Tarong ba gud na?

Unya, kamong taga Highway Patrol, pagbinuotan g'yud tawon mo. Kun kadto'ng mga mipara nako kagahapon og nagbinuang pa, sigurado g'yud nga makasugat og problema.