Balay gironda, mga armas ug shabu nasakmit
CEBU, Philippines — Lalaki nga nagdala-dala og armas gidakop ug nakuhaan og pinaketeng shabu human gironda sa kapolisan ang iyang pinuy-anan diha sa Barangay Manga sa lungsod sa Alcantara niadtong Huwebes , Oktobre 22.
Nakumpiskar sa kapulisan ang duha ka armas de fuego, 33 ka bala ug 3.97 gramos nga gidudahang shabu nga nagkantidad og P26,996 atol sa pagpatuman sa search warrant sa balay sa usa ka Ryan Basilisco Lantice.
Nadakpan atol sa operasyon sa Alcantara Municipal Police Station ang suspek. Ang nakuha gikan kaniya mao ang usa ka .38-caliber revolver, usa ka KG9 Luger firearm, 30 ka bala sa 9mm, tulo ka bala sa .38 caliber, usa ka magasin sa KG9 ug usa ka holster sa armas.
Narekober usab sa kapulisan ang 25 ka heat-sealed plastic sachet nga adunay puti nga kristal nga substansiya nga gidudahang shabu, nga mitimbang og 3.97 gramos ug adunay kantidad nga P26,996 sumala sa Dangerous Drugs Board (DDB). Lakip usab sa mga nakumpiskar ang usa ka itom ug usa ka yellow-green nga pouch.
Gipatuman ang search warrant nga giisyu sa Regional Trial Court (RTC), Branch 96 sa Barili, Cebu, kalabot sa giingong paglapas sa Republic Act 10591 o Comprehensive Firearms and Ammunition Regulation Act tungod sa pagtinil og armas.— IBM BANAT NEWS
- Latest
