Gihikawan sa kaugalingong tugkaran

Salikwaot kaayo tan-awon nga naa sa imong tugkaran ang pasilidad nga makasulbad sa imong problema. Apan igo nalang ka sa pangindahay kay dili man ka tugotan nga makagamit niini, samtang ang uban gitugotan na nga mogamit, pastilan ka dakong binuang.

Bitaw kini ang sitwasyon sa Cebu City government ug sa Binaliw landfil nga gitugotan na sa Department of Envirornment and Natural Resources nga maka-operate na og balik human sa nahitabong trashlide niadtong Enero diin kapin sa 30 ka kinabuhi ang nakalas.

Bisan pa man niini, wala pa gyud intawon palabaya og basura ang dakbayan sa Sugbo nga nag gasto og kapin sa kwatro milyones pesos kada adlaw alang sa paglabay og basura didto sa Lungsod sa Aloguinsan.

Nagpahigayon na og bidding ang Cebu City kaupat na ka higayon apan wala man moapil ang Prime Waste nga maoy nagdumala sa landfil. Wala pa matino ang hinungdan apan gituohan nga gusto niini nga mabayran sa City government ang 130 million pesos nga obligasyon ngadto kanila.

Aduna nay kwarta alang niini pero dili mosugal og bayad si Mayor Nestor Archival kay wala may mga dokumento nga gipakita gikan sa kanhi city treasurer nga nataktak sa katungdanan. Gawas pa, ang bayronon dili iya sa Archival administration kon dili nangagi nga administrasyon. Naneguro ang legal team sa mayor nga dili sila masulod sa taro kong mobayad nga walay hanig nga mga dokumento.

Mitambag gani ang LGU sa Primewaste nga ikiha nalang ang city government aron ang korte na ang mokuhom ug momando nga bayran ang P130 million, usa kini ka friendly case matud sa mayor. A

ng pangutana kong mohimo ba usab niini ang nagdumala sa Binaliw Landifil? basin og nangluod ang Prime Waste kay duna may mga ubang konsehal nga padayong nagkwestyon sa tulobagon nila sa nahitabong trahedya.

Sa ingon niini nga sitwasyon dili ba pwede makapangita og solusyon ang city government aron makakab-ot sila og win win solution? Kong gustohon sa LGU mahimo gyud kay naa man sa syudad ang ilang negosyo, nag gamit sila sa karsada padung ug pabalik sa pagkolekta og basura gikan sa mga kliyente nga gawas sa Cebu City.

Sa nahitabo karon mora'g nahulog nga makaluluoy ang dakbayan nga nahikawan sa kahigayonan nga makapahimulos sa duol ug sayon nga labayanan sa basura. Pero duna may balaod nga kinahanglan tumanon nga angayan ra usab nilang himoon.