"Friends of court"

Kulbahinam kaayo karong Miyerkules kay ang mga Senador hatagan og ideya sa mga legal experts kon unsaon sa paghukom ang kaso nga gipasaka batok ni Vice President Sara Duterte.

Upat ka retired Supreme Court justices, apil na ang Sugboanon nga si Hilario Davide Jr. nga nahimong chief justice, giimbitar isip mga Amici Curiae, kun “friends of court.”

Si Davide makapasabot gyud kon unsay gipasabot sa mga pulong “2/3 of all members of the Senate” nga maoy giingon nga makahukom sa kaso batok sa mga opisyal nga gipasakaan og kaso kay apil man siya sa Constitutional Commission nga mihimo sa Konstitusyon kaniadtong 1987.

* * *

Ingon niini ang mga argumento. Dunay miingon nga kay ang Konstitusyon miingon man nga ang kaso hukman sa 16 ka Senador nga maoy 2/3 sa 24 ka Senador sa nasud, kon kini maoy himoon, makuli gyud nga makonbikto si Sara Duterte.

Kon ibutang nato nga tugotan ang ubang Senador nga makabotar, apil kadtong napriso ug ang mga nagtago-tago, wa man sila makatambong sa gipahigayong trial sa kaso?

Ang argumento sa ubang legal experts mao nga unsaon man sa paghukom sa mga Senador nga wa makatambong sa trial nga gihimo sa Senado kay napriso man sila, sama nilang Senador Jinggoy Estrada ug Rodante Marcoleta?

Aw, mogawas gyud diha nga ang ilang hukom ibase na lang sa “political affiliation” kon hain sila nga grupo misuporta, ug dili na gyud sa merito sa kaso.

Hinuon, angkonon man nato ug dili, ingon niini man gyud ang resulta. Sigurado man ko nga kining mga Senador nga kaalyado sa administrasyon, dili man gyud ni sila mobotar aron i-abswelto si Sara.

Dili sab ko motuo nga ang mga senador nga kaalyado sa mga Duterte mohukom nga ipakonbikto nila si Sara. Mao nga ang hukom gyud sa mga Senador, ibase ra gyud na nila kon asa sila mialalay.

Usa kini sa nindot nga punto nga kuhaan og legal advice gikan sa mga Amici Curiae kon kadtong mga senador nga wa gyud makatambong sa trial sa kaso batok ni Sara, mahimo ba sila nga makabotar kon magbotasyon na.

Pananglit si Senador Ronald “Bato” Dela Rosa mokalit lang og tunga sa Senado aron siya mobotar, unsa man angay ba siyang tugotan sa pagbotar nga wa man siya makatambong sa trial?

Si Senador Loren Legarda hinuon, tan-aw nako, mahimo ra siya nga katugotan kay nakatambong man siya dihang gisugdan ang trial sa kaso, ug igo lang mi-absent kay nagpatambal sa gawas sa nasud.