Army Reservist arestado sa matataas na kalibre ng baril
MANILA, Philippines — Ibat-ibang matataas na kalibre ng baril ang nasamsam ng mga awtoridad sa bahay ng isang Army Reservist sa Taguig City, kamakalawa ng gabi.
Kinilala ni Southern Police District (SPD) Director P/Brig. General Kirby John Kraft ang suspek na si Ronnie Castañeda Gonzales, 55, residente ng Mangustan Street, Brgy. Katuparan, Taguig City.
Napag-alaman na dakong alas-9:00 ng gabi noong Biyernes nang isagawa ang pagsalakay sa bahay ng suspect sa bisa ng search warrant na inisyu ni Judge Byron San Pedro ng Regional Trial Court Branch 15-FC, Taguig City.
Nasamsam sa raid ang matataas na uri ng armas na kinabibilangan ng isang Sub-Machine Gun (US made) cal .45 M3, M16 A1 Rifle Eliseo, isang Shooter Caliber 45 pistol, isang SAM Caliber 45 ACP pistol at ibat-ibang uri ng bala.
Ang pagkakatuklas ng mga tinatagong baril ng suspek ay nag-ugat sa idinulog na reklamo ng sariling anak na siya ay tinutukan ng baril ng ama, dahilan upang mag-aplay ng search warrant ang mga awtoridad.
Nakakulong ang suspek sa Taguig City Police Station na nahaharap sa paglabag sa Republic Act 10591 (Illegal Possession of Firearm and Ammunitions).
- Latest
