2 miyembro ng NPA tiklo ng NCRPO
MANILA, Philippines — Nadakip ng pulisya ang dalawang pinaniwalaang miyembro ng New People’s Army (NPA) na itinuturo rin na kabilang sa ‘top most wanted person (MWP)’ sa Metro Manila, ayon sa ulat ng National Capital Region Police Office (NCRPO).
Kinilala ni NCRPO chief Brig. Gen. Jonnel Estomo ang mga suspect na sina Kent John Magdadaro, 24 at Arnel Magdadaro, 43. Nadakip sila dakong alas-12:10 ng hapon sa isang construction site sa may Taft Avenue sa Brgy. 49, Pasay City.
Ayon sa pulisya, kapwa miyembro ng Ka Rogelio Suson, alyas ‘Manong command’, Komite Probinsya 4, sa Masbate.
Wanted si Kent John sa apat na kaso ng murder at attempted murder, habang si Arnel ay wanted naman sa tatlong kaso ng murder at attempted murder ng Cataingan, Masbate Regional Trial Court Branch 49, na walang inilaang piyansa.
Isinuko na ang dalawang suspek sa Quezon Provincial Police Office habang isinauli na ang warrant of arrest sa korte at naghihintay ng kautusan sa ‘commitment order’ sa mga nadakip.
- Latest
