Ilang nagwagi sa NCR, naiproklama na!
MANILA, Philippines — Ilang oras matapos ang halalan ay nakapagproklama na ng ilang mga nagwaging alkalde at bise alkalde sa mga lungsod sa Metro Manila ang lokal na Commission on Election (Comelec).
Mayorya sa mga ito ay mga incumbent na mayor at bise-mayor.
Sa eastern metro, proklamado na ang mga kandidato sa pagka-alkalde at bise alkalde na nagwagi sa May 9 na kinabibilangan ng mga lungsod ng Pasig, Marikina, Mandaluyong at San Juan.
Nabatid na kabilang sa mga nanalo at maagang naiproklama ng Comelec ay si San Juan City Mayor Francis Zamora, na maglilingkod sa kanyang ikalawang termino, at ang kanyang ka-tandem na si Vice Mayor Warren Villa. Proklamado na rin si Cong. Atty. Bel Zamora. Nakalaban ni Zamora sa eleksiyon si Jun Usman.
Proklamado na rin para sa kanyang ikalawang termino si incumbent Pasig City Mayor Vico Sotto, na tinambakan sa halalan ang kanyang katunggali na si Vice Mayor Iyo Bernardo.
Wagi rin ang kanyang running mate na si incoming Pasig Mayor Dodot Jaworski gayundin si Cong. Roman Romulo.
Maging si Marikina City Mayor Marcelino Teodoro ay naiproklama na rin para sa kanyang ikatlo at huling termino, gayundin ang kanyang maybahay na si incoming Cong. Maan Teodoro.
Malaki ang lamang sa boto ni Teodoro laban sa kanyang katunggali na si Marikina City Cong. Bayani Fernando.
Reelected rin naman si Marikina Vice Mayor Marion Andres.
Sa Mandaluyong naman, wagi si incoming mayor Ben Abalos laban kay Florencio Solomon at inaasahang anumang oras ay maipuproklama na rin. Nanalo rin sa halalan si incoming vice mayor Menchie Abalos habang Cong. naman si Neptali Gonzales.
- Latest
