Metro Manila mayors nagkasundo, magpapasa ng ordinansa sa pagpapalabas sa mga bata
MANILA, Philippines — Nagkasundo na ang mga alkalde na mga miyembro ng Metro Manila Council (MMC) na magpasa ng ordinansa sa kani-kanilang siyudad para isulong ang bagong labas na polisiya ng pamahalaan sa pagpapalabas na sa mga bata sa kanilang tahanan.
Sa inilabas na Resolution No. 21-11 Series of 2021, hinihikayat ang mga lokal na pamahalaan ng Metro Manila na maglabas ng ‘executive order’ o ordinansa para maglabas ng listahan ng mga outdoor areas o parke na maaaring puntahan ng mga bata.
Kasama rin dito ang paglilinaw mabuti sa ibig sabihin ng ‘parks’ na maaaring maging mga open areas sa tabi ng mga establisimyento o malls; pagtatakda sa 50% kapasidad sa mga outdoor areas; pagtatalaga ng mga marshalls na maninita sa mga lumalabag; pagtatakda na palaging may kasamang adult ang isang bata; at iba pa.
“These are the conditions that Metro Manila mayors could adopt in issuing executive orders or crafting their respective ordinances in their localities,” paliwanag ni Metropolitan Manila Development Authority (MMDA) Chairman Benhur Abalos.
Nitong Hulyo 8, naglabas ang Inter-Agency Task Force for the Management of Emerging Infectious Diseases (IATF) ng Resolition No. 125 na pinapayagan ang mga bata na may edad 5 taon pataas na makalabas ng bahay at magtungo sa mga outdoor areas sa mga lugar na nasa ilalim ng ‘modified general community quarantine at general community quarantine’.
- Latest