Buy-bust nauwi sa shootout: 2 ‘tulak’, todas
MANILA, Philippines — Kapwa binawian ng buhay ang dalawang umano’y ‘tulak’ ng ilegal na droga nang makipagbarilan sa mga operatiba sa tangkang pagtakas sa isinagawa operasyon kamakalawa ng gabi sa Pasay City.
Kinilala ni Pasay Police Acting Chief, P/Colonel Pay-Os ang mga nasawing suspek na sina Ronnie Bona, alyas Muslim, 37, at Joseph Matuguina, alyas Ogag, 38.
Sa ulat, naganap ang engkuwentro sa pagitan ng mga operatiba ng Station Drug Enforcement Unit (SDEU) dakong alas-9:45 ng gabi kamakalawa sa Amazing Show Theater, sa Brgy.76, Pasay City.
Unang isinagawa ang buy-bust operation sa mga suspect pero sa gitna ng transaksyon nagduda umano na mga pulis ang katransaksiyon kaya’t bago pa sila malapitan ng mga nakaposteng operatiba para arestuhin ay nagtangka nang tumakas sakay ng isang Honda Beat motorcycle ang mga ito..
Habang tumatakas ay pinutukan ng back rider ang direksiyon ng mga humahabol na pulis na nauwi sa palitan ng putok.
Walang tinamaan sa mga operatiba habang ang dalawa ay kapwa napuruhan sa naganap na barilan.
Narekober ang P50k na buy-bust money na kinabibilangan ng 40 pirasong boodle P1k bills at genuine 1k bills na P10,000.00; shabu; isang pistola at isang revolver.
- Latest