LRT-1 Roosevelt Station isasara sa loob ng 3-buwan

MANILA, Philippines — Nakatakda nang simulan sa Setyembre 5, araw ng Sabado, ang pansamantalang pagsasara ng Roosevelt Station ng Light Rail Transit Line 1 (LRT-1) sa Quezon City upang bigyang-daan ang pagtatayo ng Unified Grand Central Station doon.

Ayon sa LRT-1, na pinangangasiwaan ng Light Rail Manila Corporation (LRMC), aabutin ng mahigit tatlong buwan ang pagsasara sa naturang istasyon ng tren o hanggang Disyembre 28.

Nabatid na ang naturang itatayong unified station ang magsisilbing common station na magdurugtong sa mga estasyon ng LRT-1, Metro Rail Transit Line 3 (MRT-3) at nang ginagawa pa lamang na MRT-7.

Inaasahang sa sandaling matapos ito ay magiging mas mabilis na paglipat ng mga tren ng mga pasahero.

Samantala, tiniyak naman ng LRT-1 na tuloy ang operasyon ng kanilang mga tren mula sa Baclaran station hanggang Balintawak station.