Pasig LGU, maglalagay ng high priority bicycle corridor

MANILA, Philippines — Inanunsiyo ni Pasig City Mayor Vico Sotto na maglalagay sila ng high priority bicycle corridor sa lungsod upang maengganyo ang mas maraming residente na gumamit na rin ng bisikleta sa pagbiyahe at pagpasok sa trabaho.

Sinabi ng alkalde na kailangang magsulong ng mga reporma dahil sa limitadong bilang ng pampublikong transportasyon ngayong may krisis pa sa bansa.

Ayon kay Sotto, magsisimula ang high priority bicycle corridor sa bahagi ng Amang Rodriguez Avenue, dadaan ng West Bank road, C. Raymundo, A. Mabini, Dr. Sixto Avenue extension hanggang F. Manalo at Caruncho.

Maglalagay din aniya sila ng road safety treatments sa mga makikitid na kalsada at mas maraming bike racks.

Tiniyak pa ng alkalde na magbibigay din ang lokal na pamahalaan ng employee transportation loans para sa mga nais bumili ng bike o scooter.

Magsasagawa rin aniya ang lokal na pamahalaan ng information campaign sa pagbibisikleta at road safety sa pa­ngunguna ng Pasig Transport Department.

“Lalo tuloy nating nakita ang kakulangan ng imprastraktura para sa mga alternatibong uri ng transportasyon. Sa ordinar­yong panahon, wala pang 30% ng tao ang bumabiyahe gamit ang private cars, ngunit mahigit 80% ng kalsada ang sakop nila,” aniya pa.

Bukod sa Pasig City, kabilang din sa mga unang tumugon sa panawagan ng DILG ay ang mga lokal na pamahalaan ng Quezon City, San Juan City at Taguig City.