Mga estudyante, bigyan ng assignment- DepED
Kahit suspendido ang klase...
MANILA, Philippines — Hinimok kahapon ni Department of Education (DepEd) Secretary Leonor Briones ang mga guro na bigyan ng assignment o takdang-aralin ang kanilang mga mag-aaral upang hindi masayang ang mga araw na suspendido ang klase dahil sa coronavirus disease 2019 (COVID-19).
Sinabi ni Sec. Briones, dapat tiyakin ng mga guro at ng pamunuan ng eskwelahan sa mga lugar na nagdeklara ng suspensyon ng klase na magpapatuloy pa rin ang learning process ng kanilang mga estudyante kahit na sila ay walang pasok.
“DepEd officials in the field, at the regions, divisions, and schools are directed to facilitate the communication of teachers with the students and their parents, to provide the necessary assignments to continue the process of learning of the required competencies,” ani Sec. Briones.
Inaasahan namang kaagad na magpapalabas ang DepEd ng dagdag na guidelines at direktiba hinggil dito.
Kaugnay nito, kinumpirma ni Briones na inaprubahan ni Pangulong Rodrigo Duterte ang rekomendasyon ng Inter-Agency Task Force (IATF) na suspendihin ang klase sa Metro Manila simula nitong Martes, Marso 10, 2020, hanggang sa Sabado, Marso 14, upang bigyangdaan ang pagdi-disinfect sa mga paaralan para patayin ang anumang virus na naroroon. Aniya, magiging epektibo lamang ang ilang araw na suspensyon ng klase kung gagawin ng lokal na pamahalaan at ng mga magulang ang kanilang tungkulin na tiyaking mananatili sa mga bahay ang mga bata at hindi hahayaang lumabas at magtungo sa matataong lugar, gaya ng mga malls at iba pa.
- Latest