Spa na ‘front’ ng prostitusyon, ni-raid

Ipinasara ng City govern­ment ng San Juan ang isang spa massage na sinasabing ‘front’ ng prostitution, kahapon ng hapon

Mismong si San Juan City Mayor Francis Zamora ang nanguna sa pag-raid at pagpapasara sa Michiko Spa, na matatagpuan sa Santolan Road malapit sa Ortigas Avenue, pasado alas-2:00 ng hapon.

Nauna rito, nakatanggap ng sumbong ang munisipyo na nag-aalok ng ‘extra service’ ang mga masahista sa nasabing spa kaya’t kaagad itong sinalakay.

Wala naman ang may-ari ng spa na nakilala lang na si Felipe Tamang, nang mangyari ang operasyon, at kaagad ding nag-alisan ang mga trabahador nito. Maaari raw itong maharap  sa patung-patong na kaso, gaya ng human trafficking.

Natuklasan din na nag-ooperate ang spa na walang mayor’s permit. 

Ayon kay San Juan City Police chief, P/Col. Jaime Santos, kukunan nila ng sinumpaang salaysay ang apat na babae na kanilang nasagip upang magamit sa isasampang kaso.  

Sa panig naman ni Zamora, ipinag-utos nito ang regular na pag-inspeksiyon ng mga pulis ang ganitong uri ng mga negos­yo upang matiyak na hindi gumagawa ng labag sa batas.