Taxi driver, 1 pa timbog sa holdap
MANILA, Philippines — Isang taxi driver at isang miyembro ng Sigue-sigue Sputnik Gang ang nalambat ng mga awtoridad kaugnay sa panghoholdap ng isang milk tea house sa isinagawang dragnet operations ng Manila Police District (MPD), iniulat kahapon.
Ipinagharap na ng reklamong robbery/holdup sa Manila Prosecutor’s Office ang mga suspek na kinilalang sina Danilo Leogo, 51, miyembro ng Sigue-sigue Sputnik Gang at ang taxi driver na holdaper na si Rustom Boncales, 44.
Sa ulat mula sa tanggapan ni MPD-Station 10 chief, P/Lt. Colonel Julius Anonvo, habang nagsasagawa ng ‘Oplan Sita’ sa Pedro Gil St., Sta. Ana, Maynila ang kanyang mga tauhan dakong alas -10:00 ng umaga nang humingi ng saklolo ang biktimang si Nicca Jane Angeles, 18, cashier, hinggil sa dalawang holdaper na tumangay ng benta sa Frapee Tea na sakay ng taxi.
Agad na nangalap ng CCTV sa lugar at doon nakumpirma ang holdapan at plaka ng taxi na inalarma rin ng District Tactical Operations and Communication (DTOC) ang posibleng daanan ng tumatakas na puting taxi na Toyota Vios (UVB 489).
Naispatan sa bahagi ng Concepcion Aguila St., Sta Mesa ang sasakyan ng mga suspek kung saan hinarang at inaresto ang mga ito.
Positibong kinilala ng biktima ang mga suspek kaya nabawi ang cellphone at cash na nasa kabuuang P11,000.
- Latest