Junkshop hinoldap: Driver patay, P2-million kita tangay
MANILA, Philippines — Patay ang truck driver ng isang junkshop matapos barilin, habang masuwerteng nakaligtas ang kasamahan nito makaraang holdapin ng hindi pa natutukoy na riding-in-tandem suspects at matangayan ng nasa mahigit P2-milyong kita ng junkshop sa Brgy. Commonwealth, sa lungsod ng Quezon, kamakalawa.
Nagtamo ng tama sa kaliwang bahagi ng leeg ang biktimang si Roxan Magno, 25, habang nakatakbo at nakaligtas naman ang kasamahan nito na si Darwin Vianzon, 36.
Sa ulat ng Quezon City Police Districit (QCPD), dakong alas-12:30 ng tanghali nang dumating ang dalawa sa pinagtatrabuhang junkshop dala ang kaka-withdraw pa lang sa banko na kita ng junkshop na P2,065,000.
Dito ay biglang sumulpot ang mga suspek at nagdeklara ng holdap habang nakatutok sa dalawa ang hawak na baril ng backrider at puwersahang kinuha ang sling bag ni Vianzon na naglalaman ng P65,000 na agad na nakatakbo para sa kanyang kaligtasan.
Matapos nito ay sunod namang kinuha ang backpack ni Magno na naglalaman naman ng P2-milyon at walang sabi-sabing binaril ito sa kaliwang bahagi ng leeg at agad na tumakas sa direksyon ng Commonwealth Ave.
Nagawa pang maisugod sa pagamutan si Magno ngunit idineklarang dead-on-arrival sa Fairview General Hospital.
Patuloy ang imbestigasyon ng pulisya sa naturang kaso.
- Latest
